Eth Plen deth Conselh Generau d’Aran a aprovat eth pressupòst generau consolidat dera entitat entar an 2014 damb es vòts favorables deth govèrn de CDA-PNA, e es vòts en contra des grops d’UA-PSC e PRAG.
Eth pressupòst entar an 2014 ascendís a 30.746.517,27 €, desglossat dera següenta forma:
– Conselh Generau d’Aran: 28.860.142,89 €
– Servici Aranés de Benéster e Salut: 14.477.312,04 €
– Foment Torisme Val d’Aran: 647.500,00 €
– Transpòrt e Emergéncies Sanitàries Val d’Aran: 1.560.509,96 €
– Aran Salut Servicis Assistenciaus Integrats: 11.536.886,00 €
– Servicis Ambientaus Val d’Aran: 675.200,00 €
– Torisme Juvenil Val d’Aran: 684.174,04 €
– EPE Emergéncies: 1.500,00 €
Aguest pressupòst entar 2014, en paraules deth sindic d’Aran, Carlos Barrera, “ei un pressupòst que da prioritat ath sector sociau (salut, benéster, educacion) en tot complir damb es requisits d’estabilitat pressupostària que merque era legislacion actuau”.
Entar an 2014, eth Conselh Generau d’Aran prevé realizar es òbres de reforma der Espitau de Vielha per un impòrt de 800.000€, eth bastiment dera naua planta de transferéncia lordères dera Val d’Aran per impòrt de 1.300.000€ atau coma es actuacions includides laguens deth programa FEDER “Espaci natura Artiga de Lin” per un totau de 650.000€.
D’aute biais, eth Conselh Generau d’Aran contunharà invertint ena reabilitacion deth nòste patrimòni culturau gràcies ara collaboracion dera Deputacion de Lleida damb uns 100.000€ e ena reabilitacion, limpiesa e mielhora des pistes, camins e accèssi deth nòste entorn naturau era chifra serà d’uns 750.000€.
En paraules de Luis Carlos Medina, conselhèr d’Administracions Publiques e Finances, “aguest ei eth mielhor pressupòst possible dada era situacion de crisi qu’estan patint es administracions, e auem d’ester orgulhosi de poder mantier es nòsti servicis basics der estat de benester enes nivèus de qualitat e eficiéncia damb es que les estam amiant a tèrme, en tot mantier es lòcs de trebalh que garantizen aguesti servicis”.
Pera sua part, en airau de Torisme, eth pressupòst aprovat s’incremènte en mès d’un 7%. “Eth torisme ei eth nòste motor economic, e aguest Govèrn priorize tanben aguest sector coma estrategic entara creacion de lòcs de trebalh”, a expausat Anna Díaz, conselhèra de Torisme, Comèrç e Consum.
Aguest an 2014 tanben se prevé contunhar dant supòrt ath sector deth comèrç autant ath nacionau coma ath transfronterèr damb campanhes de promocion en sud de França.
En un aute orde de causes, eth Plen deth Conselh Generau d’Aran a aprovat era licitacion deth contracte “Gestion integrau dera remassada e evacuacion de residus dera Val d’Aran” qu’a de perméter ua gestion mès eficienta d’aguesta competéncia delegada pes municipis dera Val d’Aran ath Conselh Generau d’Aran, e mielhorar era sua prestacion. Aguest contracte mixte contemple autant era gestion e explotacion deth servici de remassada de residus (organica, papèr, carton, veire, voluminosi) e eth bastiment dera naua planta de transferéncia qu’a de perméter ua gestion mès eficienta en tractament de toti aguesti residus.
Eth Plen tanben a dat eth visteplatz ara modificacion deth Decret des certificacions deth nivèu d’aranès, a on s’incorpòre eth nivèu “D” e s’equiparen es requisits d’accés as places dera administracion que requerissen arténher un nivèu lingüistic concret, en tot adaptar eth Decret as modificacions legislatives des darrèri ans (Lei 35/2010).
Atau madeish, eth Plen deth Conselh Generau d’Aran s’a adherit ara mocion sus era singularitat d’Aran qu’aprovèc eth Parlament de Catalunya eth passat 27 de hereuèr de 2014, ena quau ditz “reconèixer, emparar i respectar la singularitat nacional, dins de Catalunya, d’Aran, entitat territorial objecte d’una particular protecció per mitjà d’un règim jurídic especial.”
Coma ahèr d’urgéncia, s’a aprovat ua mocion de supòrt ath collectiu de trebalhadors de Neolectra- Carboneco-Cavar Nacarii entà sajar qu’eth Govèrn der Estat reconsidère era naua Lei deth Sector Electric que met en grèu perilh es sòns lòcs de trebalh.