Eth pòble de Bagergue artenh era maximala distincion de Viles Florides 2016

seteme 20, 2016 Notícies
  • Bagergue arrecep 4 Flors d’Aunor d’un maximal de 5.
  • En aguesta edicion de Viles Florides 2016 participèren 86 municipis de tota Catalonha.

 

marc tarrau-vila florida

Foto: Marc Tarrau (President EMD Bagergue).

 

Era gala Flors d’Aunor 2016 liurèc eth passat diuendres, 16 de seteme, en Olot es reconeishements annaus deth movement Viles Florides, en un acte presidit pera consellera d’Agricultura, Ramaderia, Pesca e Alimentacion dera Generalitat de Catalonha, Meritxell Serret, e que amassèc mès de 250 persones.

Bagergue (Naut Aran) entèste eth classament deth projècte Viles Florides que promò era Confederació d’Horticultura Ornamental de Catalunya (CHOC) seguida per Figueres (Alt Empordà), Mollet del Vallès (Vallès Oriental), Olot (Garrotxa) e Vila-seca (Tarragonès).

Aguesti cinc municipis sigueren arreconeishudi damb quate Flors d’Aunor, mès tanben i auie 31 municipis damb tres Flors d’Aunor, 44 municipis damb dues Flors d’Aunor e 6 municipis damb ua Flor d’Aunor. Eth totau en aguesta edicion s’avalorèren 86 municipis que trabalhen entà hèr créisher eth verd en Catalonha e que supausen un important increment de municipis participants des 66 deth 2015.

Eth president dera EMD de Bagergue, Marc Tarrau, arrecuelhec es 4 Flors d’Aunor, e arregraïc a “toti es vesins era sua collaboracion e dedicacion entà que Bagergue arrecebesse aguest prèmi” e soslinhèc qu’ “aguesta distincion li da un sagèth de qualitat toristica ath pòble e un reclam mès entara gent que visite era Val d’Aran”.

A part deth reconeishement institucionau as municipis, Viles Florides tanben premièc aqueri projèctes d’enjardinament, ornamentacion florau e cultura deth verd urban que, tant eth sector public coma privat, son tanben un exemple a seguir. En aguest sens, se liurèren es reconeishements: Iniciatiues Florides ara Fondacion deth Vielh Espitau de Sant Jaume d’Olot (Collectiu Florit); eth Centre Botanic de Reus (Cornèr Florit); era Rambla Pompeu Fabra de Mollet del Vallès (Espaci Public Florit); eth Jardin Botanic Marimutra de Blanes (Espaci Public Florit), e La Siesta Salou Camping Resort (Camping Florit).

 

 

Vielha, 20 de seteme de 2016

 

Conselh Generau d’Aran: Núria Sanjuan

Fotos: Marc Tarrau (President EMD Bagergue)

Comments are closed.