• Deman dissabte, 7 de noveme, er Ajuntament de Les a organizat un acte d’aumenatge a dus des sòns abitants, Aymar Navarro e Nacho Sacau.

Se tracte d’ua reconeishença pes merits esportius artenhudi, per part dera Vila de Les a Aymar Navarro e a Nacho Sacau.

Aymar Navarro, freerider professionau, hè concurréncia en Freeride Wolrd Tour, considerat eth melhor freerider nacionau e un des melhors a nivèu europèu. Aguest ostiu premanic era sua pre-sason en Sud America, aquiu ère iuèrn e podec trobar ues condicions de nhèu espectaculars. Podec daurir ua baishada extrèma, ei a díder, un descens vèrge que jamès arrés auie hèt abans. Aguesta baishada ei plaçada enes Andes, apròp dera estacion d’esquí de “Las Leñas”, se tracte d’ua baishada fòrça tecnica e d’accès dificil e remot. Aymar Navarro, amassa damb un companh american, quan realizèren eth descens la batièren coma: “Canal de Les”, en aunor ath sòn pòble natal.

Nacho Sacau ei un alpinista non-professionau, mès maugrat açò aguest ostiu artenhec amassa damb un grop redusit d’alpinistes era cresta deth Nun de 7135m (India). Nacho Sacau ei un intrèpid aventurèr e esportista, toti es espòrts que se pòden practicar ena montanha eth les practique, destaque pera sua polivalència e sustot per èster un des maximals coneishedors des vies d’escalada de ròca e de gèu dera Val d’Aran. Collabòre damb er Ajuntament de Les en equipar e revisar es installacions d’escalada deth municipi, atau coma collabòre en equipament d’autes modalitats coma eth barranquisme e vies herrades.

Aguest passat dissabte Nacho organizèc ua gessuda especiau, hèr era via herrada de Les de net. Equipèc era via damb illuminacion e provedic de materiau as persones que non disposauen d’aguest materiau tecnic. Participèren 35 persones, mès des previstes, hèt que demòstre qu’aguesta activitat siguec tot un èxit.