• Era sindica d’Aran, Maria Vergés, a recebut aguest maitin ena sedença deth Conselh Generau d’Aran ath president dera Generalitat de Catalunya, Pere Aragonès, a qui a arregraït era sua visita e a transmetut era volentat deth govèrn deth Conselh Generau d’Aran d’establir ua naua etapa ena relacion bilaterau damb era Generalitat de Catalunya, basada ena leiautat e respècte institucionau, entà arténher er assolidament der autogovèrn aranés
• Pendent aguesta visita institucionau, eth president e era sindica an copresidit eth plen extraordinari deth Conselh Generau d’Aran, en qué s’a aprovat era declaracion institucionau d’autrejament deth Prèmi 17 de Junh ara gent grana d’Aran, coma reconeishement ath sòn sacrifici, esfòrç e actitud pendent era pandemia, ena qu’an estat eth collectiu mès vulnerable e mès afectat

Era sindica d’Aran, Maria Vergés, a recebut aguest maitin ath president dera Generalitat, Pere Aragonès, qu’a copresidit eth plen extraordinari deth Conselh Generau d’Aran celebrat ena sedença institucionau dera maxima institucion aranesa en Arròs.

“Deth govèrn d’Aran ençà èm plan satisfets e arregraïts pera visita deth president Aragonès, a qui è trasladat pendent era nòsta trobada era volontat deth Conselh Generau d’Aran d’encetar ua naua etapa damb er executiu catalan, entà daurir vies de dialòg e consens, dera leiautat e respècte institucionau ençà, entà hèr front a toti es rèptes qu’eth nòste territòri a per endauant”, afirmaue era sindica d’Aran, que higie que: “auem tractat diuèrsi ahèrs primordiaus entath nòste territòri coma er assolidament e melhora der autogovèrn aranés a trauès deth desplegament efectiu dera Lei d’Aran, era preservacion, normalizacion e impuls der aranés atau coma dera nòsta cultura e identitat, e eth desvolopament de politiques sociaus qu’atenguen es besonhs dera nòsta ciutadania, entre d’auti”.

En aguest sens, era sindica tanben a sollicitat ath president que se pogue amassar era Comission Bilaterau damb era major brevetat possibla, entà tractar-i es ahèrs concrèts de cada departament.

Pera sua part, eth president Aragonès a manifestat que “era visita a Aran a estat era mia dusau visita coma president dera Generlitat, coma mòstra de compromís damb eth territòri e damb eth govèrn deth Conselh Generau d’Aran, damb qui aué encetam ua naua etapa ena nòsta relacion bilaterau, damb era volontat d’auançar en un desplegament efectiu dera Lei d’Aran” e higie que: “auem era volontat de refortilhar era relacion dera Generalitat de Catalunya damb eth Conselh Generau d’Aran, atau coma de trabalhar ena promocion e proteccion dera lengua pròpria d’Aran”.

En finalizar aguesta amassada, era sindica d’Aran e eth president dera Generalitat an visitat, acompanhadi dera conselhèra de Coneishement deth Conselh Generau, Angelina Cases, er Institut d’Aran, a on s’an amassat damb er equip directiu e es representants dera Associacion de Mairs e Pairs des estudiants, damb qui an parlat sus es problematiques e rèptes qu’a  afrontat eth sector der ensenhament pendent es darrèri mesi de pandemia, atau coma sus es principaus besonhs e rèptes dera educacion en Aran.

Eth president Aragonès a copresidit eth plen en session extraordinària deth Conselh Generau d’Aran, en quau s’a aprovat era declaracion institucionau tà concedir aguest Prèmi 17 de Junh ara gent grana dera Val d’Aran.

Era sindica d’Aran explicaue qu’aguest guerdon “ei era forma ena qu’eth Conselh Generau d’Aran reconeish er esfòrç qu’an amiat a tèrme es persones granes dera Val d’Aran, qu’an estat es mès afectades pera crisi sanitària e que n’an patit es conseqüéncies mès intenses” e higie que “damb aguest gèst qu’amiaràm a tèrme pendent era Hèsta d’Aran, les volem tanben arregraïr era sua generositat, trabalh e aportacion entà bastir era Val d’Aran qu’aué coneishem”.