• Aguest programa deth SOC aufrís as joeni era oportunitat laborau d’incorporar-se en diuèrsi airaus dera administracion pendent uns mesi entà contribuir a melhorar er emplec des servicis publics

• En cas deth Conselh Generau d’Aran, dus d’eri s’an incorporat ath departament de torisme e dus mès s’an hijut ar airau de tractament de residus, entà desvolopar un trabalh de conscienciacion e informacion ara poblacion entà melhorar eth servici de remassada de lordères e promòir eth reciclatge

Quate joeni s’an incorporat ara plantilha deth Conselh Generau d’Aran per miei deth programa Garantia Juvenil deth SOC, Generalitat de Catalunya e Hons Sociau Europèu, ua oportunitat laborau entà eri qu’ath delà servís entà contribuir a melhorar er us des servicis publics en diuèrsi ambits. En aguest cas, s’an incorporat as airaus de torisme e de tractament de residus.

Es dues persones der airau de tractament de residus amiaràn a tèrme foncions d’Agents Civics e desvoloparàn pendent aguesti mesi un trabalh fòrça important en tot recórrer es negòcis aranesi explicant quini son es procediments qu’an de seguir entà evitar es colapses deth servici de lordères.

Era incorporacion des Agents Civics ei ua des accions qué a prenut eth govèrn deth Conselh entara melhora deth servici de lordères e dera conscienciacion deth besonh de reciclar. S’a iniciat ua campanha enes hilats entà informar der emplec corrècte d’aguest servici atau coma promòir eth reciclatge e eth civisme.

Ath delà, eth sindic d’Aran, Francés Boya, e eth Conselhèr de Territòri, Paisatge e Gestion Ambientau, Oriol Sala, an mantengut dejà dues amassades de coordinacion damb era empresa Romero Polo entà cercar solucions as problematiques existents.

S’an mantengut tanben amassades damb toti es alcaldes e alcaldesses dera Val d’Aran entà escotar de prumèra man es besonhs de cada pòble entà sajar de melhorar era eficiéncia deth servici de recuelhuda, especiaument en aqueres dates enes quau era Val d’Aran quadriplique era sua poblacion e, en conseqüéncia, es lordères que genère.