Er Espannyol superèc ar equip aranés per 0-14.

Es blanc-e-blus finalizen aué eth sòn stage ena Val d’Aran.

Eth RDC Espanyol disputèc ager, 20 de junhsèga, en camp de fotbòl deth Naut Aran en Garòs, eth sòn prumèr partit de pretemporada contra ua seleccion de jogadors dera Val d’Aran a on es barcelonesi guanhèren as aranesi per 0-14.

Eth tecnic blanc-e-blu, Sergio González, se portèc ua bona impression deth prumèr partit amistós de pretemporada “me quedi damb era sensacion qu’es jogadors an hèt un bon trabalh deuant un rivau qu’ei incomòde de jogar. Es gojats an demostrat que son professionaus e an hèt un bon entrenament”. Entath tecnic, çò de mès de considerable deth partit ère “préner ritme damb era pilòta, damb fòrça velocitat, damb es movements de jogadors. En definitiva, senter-mos comòdes damb era pilòta”.

Entre es jogadors dera seleccion aranesa, dirigida per Quim Calbetó e Juli Sala, hège part er esquiador olimpic aranés, Àlex Puente.

Eth partit compdèc damb era preséncia deth president deth RCD Espanyol, Joan Collet, deth conselhèr d’Espòrts, Marcos Viló, deth conselhèr de Territòri, Eduardo Valdecantos e deth president dera EMD d’Arties e Garòs, David Torres.

Era Val d’Aran s’a anat plaçant enes darrèri ans coma era destinacion preferida per diuèrsi equips d’elèit de diferenti espòrts entà realizar part dera sua preparacion fisica mesi abans de començar era sason.

Er equip B masculin deth RCD Espanyol realizarà part dera preparacion dera sason peth prumèr còp ena Val d’Aran, deth 4 ath 8 d’agost. Atau coma tanben era seccion femenina que tanben tornarà enguan a hèr er stage de pretemporada ena Val d’Aran com ja hesse est an passat. Eth concrèt, deth 10 ath 12 d’agost.