Ei eth prumèr còp qu’un rider espanhòu artenh aguesta hita en mon der esquí freeride.

Obtenguec era siesau plaça en Andòrra e se place 9au ena classificacion generau. Damb aguesti resultats, Aymar s’assegure ua plaça en FWT 2020.

     Foto: Nevasport

Era quatau pròva deth calendari deth circuit deth Freeride World Tour siguec ager, 7 de març, ena zòna des Portelles d’Ordino Arcalís.

Un des protagonistes siguec eth rider aranés, Aymar Navarro, qu’artenhec ua siesau plaça, hèt qu’a un significat especiau. E ei qu’er aranés, damb aguesta classificacion artenh eth sòn sòni, qu’ei èster entre es top 10 des esquiadors mondiaus freeriders, en tot acabar 9au ena classificacion generau, un lòc que li permeterà participar ena pròva de Verbier, e que li da eth “passe” dirècte ath calendari deth Freeride World Tour 2020.

Er aranés gessec dusau dera sua categoria e hec ua linha fòrça fluïda qu’artenhec damb eth ua puntuacion de 72.33. Ei eth prumèr còp qu’un rider espanhòu artenh aguesta hita en mon der esquí freeride.

Aymar Navarro hec ua linha fòrça fluïda e assegurèc sentir-se fòrça comòde damb era baishada. Çò que tanh ath futur, Aymar torne tà casa entà centrar-se pendent es dues pròplèus setmanes ena pròva de Verbier. Encara que sense possibilitats d’arténher ua plaça en pòdium mondiau, er aranés lutarà egalaments entà arténher un lòc en pòdium dera pròva individuau en Soïssa.

Navarro assegurèc sentir-se fòrça erós pera hita artenhuda, pr’amor qu’“eth nivèu des riders ei fòrça naut, e èster entre es melhors a estat un trabalh dur, fòrça ans d’entrenament e d’esfòrç que dilhèu non se ven”.

Era pròva de Freeride World Tour d’Ordino Arcalís siguec un an mès fòrça espectacular. Dempús d’escartar, per motius de seguretat, eth desvolopament dera pròva ath tuc der estanh Fourcat (localizacion prevista iniciauments) s’optèc pera celebracion dera competicion ena zòna de Portelles. Era nheuada que queiguec eth dimèrcles pera net e pendent era maitiada corbic es montanhes dera estacion damb ua naua capa de nhèu povàs qu’ajudèc as riders a hèr era baishada damb mès fluïdesa e seguretat.

Siguec ua edicion a on es riders optèren per sajar fòrça trucs, en tot combinar era tecnica deth freestyle damb eth freeride entà aufrir un espectacle encara mès atractiu.

Classificacion Freerider World Tour Ordino Arcalis 2019

1- Leo Slemett Current: 2500 pts.
2- Kristofer Turdell: 2 2200 pts.
3- Andrew Pollard: 1980 pts.
4- Carl Regnér Eriksson: 1800 pts.
5- Wadeck Gorak: 1640 pts.
6- Aymar Navarro: 1500 pts.
7- Drew Tabke: 1380 pts.
8- Tom Peiffer: 1280 pts.
9- Mickael Bimboes: 1190 pts.
10- Berkeley Patterson: 1105 pts.

Aymar Navarro, signèc un convèni damb eth Conselh Generau d’Aran entà promòir era destinacion toristica esportiua Val d’Aran peth mon, representada ena imatge e enes valors deth rider aranés.

Mès informacion e videòs: https://www.nevasport.com/

Vielha, 8 de març de 2019

Conselh Generau d’Aran: Núria Sanjuan

Informacion e foto: Nevasport