Eth Govèrn d’Aran, a trauèrs deth Servici Aranés de Benéster e Salut (SABS), an signat un convèni de cooperacion damb eth Centre Hospitalier Comminges Pyrénées de Saint-Gaudens e eth Centre Hospitalier Universitaire (CHU) de Toulouse entà pr’amor de continuar e mielhorar eth tractament des urgéncies dera Val d’Aran qu’agen de besonh er accès ath CHU de Toulouse e/o ath CH Comminges Pyrénées.

En acte an estat presents eth sindic d’Aran, Carlos Barrera, eth conselhèr de Benéster e Salut, Eduardo Valdecantos, era directora Servici Aranés de Benéster e Salut (SABS), Maria Àngels Borràs, era directora deth Centre Hospitalier Comminges Pyrénées de Saint-Gaudens, Christine Girier-Diebolt, e era secretaria generau deth Centre Hospitalier Universitaire (CHU) de Toulouse, Bénédicte Motte.

Aguest convèni ei especificament dirigit a:

Es traslats inter-ospitalaris d’urgéncia entre era Val d’Aran e es estructures de tractaments dera Haute-Garonne realizats a cargue deth SAMU 31, includit es motius entà recórrer ath CHU de Toulouse, en cas de besonh, per subsidiaritat sus es èishi de collaboracion medica desvolopats pera Val d’Aran damb eth CH Comminges Pyrénées. Se sollicitarà eth permís deth SABS entàs demanes de traslats deth CH Comminges Pyrénées enquias estructures de Toulouse

Es traslats des intervencions primàries sus eth territòri aranés pes servicis deth SAMU 31.

Eth sindic d’Aran, Carlos Barrera, a soslinhat “aguest convèni supause continuar mielhorant era sanitat e eth benéster des nòsti ciutadans damb un sistèma lògic e sostenible”.

Aguest convèni a ua vigéncia de cinc ans.