Barcelona, 09 de març de 2016.- Eth sindic d’Aran Carlos Barrera, a presentat aué ath nau director generau de Prevencion, Escandilhament d’Incendis e Salvaments dera Generalitat, Juli Gendrau, eth projècte deth futur modèl de gestion integrau d’emergéncies dera Val d’Aran.

Eth passat 22 de hereuèr eth Plen deth Conselh Generau d’Aran aprovèc iniciar er expedient entara modificacion en regim de gestion deth servici d’emergéncies, prevencion e escandilhament d’incendis, rescats de montanha e proteccion civiu.
Eth sindic d’Aran, a estat acompanhat per Joan Canalias, responsable d’Emergéncies des Pompièrs d’Aran.

Ena amassada, Juli Gendrau li a confirmat ath sindic d’Aran, era assisténcia der elicoptèr d’emergéncies deth departament d’Interior dera Generalitat de Catalonha ena finau dera copa deth mon de Snowboard Cross qu’aurà lòc ena estacion de Baqueira Beret es pròplèus 19 e 20 de març.