Era conselhèra de torisme Anna Díaz arrecep aguest dijaus era distincion dera Val d’Aran coma Destinacion Toristica Intelligenta (DTI) autrejada peth ministèri d’Industria, Energia e Torisme.

Eth sindic d’Aran Carlos Barrera amassa damb eth president dera Deputacion de Lhèida Joan Reñé, a profitat era jornada inaugurau dera Hèira Internacionau de Torisme FITUR que se celèbre en Madrid, entà da supòrt ara promocion des Hèstes deth Huec deth solstici d’ostiu recentaments declarades Patrimòni Culturau Immateriau dera Umanitat pera UNESCO, coma nau atractiu toristic dera Val d’Aran e es territòris deth Pirenèu que celèbren hèstes des halhes.

Justaments eth darrèr deluns eth Plen deth Conselh Generau d’Aran, s’acuelhec ara Declaracion d’Andorra la Vella des Comunitats des Halhes des Pirenèus, damb era fin de coesionar e coordinar desparières accions damb era rèsta des 63 municipis de França, Aragon, Catalonha e Andòrra restacadi ad aguestes celebracions qu’an de servir tanben entara mantenença e era reconeishença deth valor culturau e patrimoniau unic des hèstes deth huec ena Val d’Aran.

Pendent era jornada inaugurau dera Hèira Internacionau deth Torisme eth sindic d’Aran Carlos Barrera, a agut oportunitat de parlar sus era campanha toristica d’iuèrn ena Val d’Aran e dera reconeishença dera Val d’Aran coma Destinacion Toristica Intelligenta damb eth ministre d’Industria, Energia e Torisme en foncions José Manuel Soria, e damb era ministra de Foment en foncions Ana Pastor.

Eth sindic d’Aran Carlos Barrera damb es ministres José Manuel Soria, e Ana Pastor en Fitur 2016

Serà pendent era celebracion d’aguesta edicion deth FITUR, qu’aguest dijaus era conselhèra de Torisme e Desvolopament Economic deth Conselh Generau d’Aran Anna Díaz, arreceberà de mans dera secretària generau de Torisme Isabel María Borrego, era acreditacion dera Val d‘Aran coma Destinacion Toristica Intelligenta (DTI) autrejada pera Societat Estatau entara Gestion dera Innovacion e es Tecnologies Toristiques (SEGITTUR).

SEGITTUR inicièc eth trabalh DTI ena Val d’Aran en darrèr Junh, qu’a consistit en analisar e diagnosticar es linhes d’accion realizades en Aran coma destinacion toristica enes quate variables que definissen a ua Destinacion Toristica Intelligenta, innovacion, tecnologia, sostenibilitat e accessibilitat, era fasa finau a consistit ena elaboracion d’un informe de recomanacions que s’integraràn coma programes especifics en nau Plan de Torisme dera Val d’Aran 2016-2020 qu’ena actualitat s’elabòre e que serà presentat ath sector toristic dera Val d’Aran en mes de hereuèr.

Er anterior Plan de torisme 2012-2015 dera Val d’Aran culmine damb er aqueriment d’aguesta reconeishença que s’ahig en programa de competitivitat deth Plan e a trauès deth s’an desvolopat desparières linhes de trabalh qu’an artenhut que Aran arrecebe certificacions e reconeishences, que destaquen entre eth, eth de destinacion sostenible Biosphere autrejat peth Global Sustainable Tourism Council dera Fundación Naciones Unidas, finalista enes Destination Leadership autrejadi pera National Geographic Society e era ITB de Berlin.

Serà laguens eth marc de FITUR que se presentaràn es linhes generaus des informes de Destinacions Toristiques Intelligentes (DTI’s).

Eth sindic d’Aran Carlos Barrera damb eth H. conseller Jordi Baiget

Stand de Catalunya en Fitur 2016