Vielha, 1 de març de 2019.- Eth sindic d’Aran Carlos Barrera e era conselhèra de Torisme d’Aran, Anna Díaz, participen en programa Ara Lhèida Tour de Lhèida TV qu’aguesta dimenjada a coma protagonista era Val d’Aran.

Ara Lhèida Tour ei un programa setmanau condusit per Joan Cama, damb reportatges de Rut Camí e Aleix Bergés. Er espaci, realizat damb era collaboracion deth Patronat de Torisme dera Deputacion de Lhèida, se pòt veir a trauès des televisions dera Xarxa Audiovisuau Locau. Eth programa compde damb un plató itinerant e reportatges sus era riquesa patrimoniau, culturau, istorica, gastronomica e de lotjament dera Val d’Aran.

Ena edicion d’aguest dissabte eth sindic d’Aran Carlos Barrera e era conselhèra de Torisme d’Aran, Anna Díaz, parlen des dera plaça dera glèisa de Vilac sus era aufèrta toristica, gastronomica e culturau dera Val d’Aran que destaque tanben era celebracion dera tresau cite deth circuit de Copa deth Mon FIS de snowboard cross (SBX) aguesta dimenjada ena estacion de Baqueira Beret e eth projècte de reconeishença dera Val d’Aran coma Auviatge dera Umanitat pera UNESCO que trabalhe eth Conselh Generau d’Aran.

Eth programa Ara Lhèida Tour s’emet des de Bagergue qu’a estat arreconeishut recentaments coma un des pòbles mès polidi d’Espanha.

Ara Lhèida Tour se pòt veir eth dissabte 2 de març as 22.30 ores e eth dimenge dia 3 as 14.30 ores en Lhèida TV.