• Deman dimèrcles, 14 d’octobre, eth sindic d’Aran compareisherà per prumèr còp ena Comission d’Ahèrs Institucionaus deth Parlament entà expausar era situacion actuau e es besonhs dera Val d’Aran

Per prumèr còp des dera aprobacion dera Lei d’Aran en an 2015, eth sindic d’Aran, Francés Boya, compareisherà ena Comission d’Ahèrs Institucionaus deth Parlament de Catalunya, deman dimèrcles, 14 d’octobre, entàs 10:00 ores.

“Der inici dera legislatura ençà, auem sajat que s’escotèsse era nòsta demana de dar votz as besonhs e preocupacions des aranesi e araneses en Parlament de Catalunya, atau coma establís era Lei d’Aran en sòn article 80.2”, a afirmat eth sindic d’Aran, en tot híger que: “entath govèrn deth Conselh Generau d’Aran aguesta compareishença ei primordiau entà poder dar a conéisher quina ei era situacion actuau deth nòste territòri”.

Er article 80.2 dera Lei 1/2015, deth Regim Especiau d’Aran establís que: “aumens un còp ar an s’a de celebrar un debat sus era situacion d’Aran e eth desvolopament deth sòn autogovèrn ena comission parlamentària que correspone, cossent damb eth Reglament deth Parlament. Aguest debat a de començar damb ua exposicion deth sindic”.

Pendent era sua intervencion, eth sindic d’Aran expausarà era situacion actuau d’ahèrs primordiaus entara Val d’Aran coma era lengua, era sanitat, era viuenda, eth desplegament dera Lei d’Aran e er estat des competéncies que depenen dera Generalitat de Catalunya e son pendentes d’èster traspassades ath govèrn deth Conselh Generau d’Aran, entre d’auti.

Eth sindic d’Aran daurirà eth debat que s’amiarà a tèrme ena Comission d’Ahèrs Institucionaus e que compdarà damb era intervencion des representants des grops e subgrops parlamentaris. Er acte se poderà seguir en dirècte des de Lleida TV.