• Amassa damb era vicesindica prumèra, participèren ager en Brusèlles en acte “Experiéncies en Aran e Occitània entà reforçar es lengües locaus”, organizat pera Generalitat de Catalunya damb motiu deth Dia Europèu des Lengües

Eth sindic d’Aran, Francés Boya, amassa damb era vicesindica prumèra, Maria Vergés, preneren part ager en acte qu’era Generalitat organizèc en Brusèlles entà celebrar eth Dia Europèu des Lengües.

Pendent era sua intervencion, eth sindic metec de manifèst qu’ei de besonh que Generalitat e Conselh Generau trabalhen ena madeisha direccion entà assegurar era perviuença der aranés. Atau madeish, regretèc qu’era nòsta lengua, tot e èster oficiau, non sigue considerada coma un mèrit ara ora d’opositar as places de professorat deth departament d’ensenhament dera Generalitat.

“Er aranés a per deuant fòrça rèptes que cau explicar e hèr a conéisher, ath temps qu’ei de besonh bastir complicitats damb eth govèrn catalan e tanben damb era rèsta d’Occitània entà arténher consensi e linhes de trabalh que vagen en favor dera nòsta lengua pròpria” declaraue eth sindic.

Pera sua part, era vicesindica prumèra, Maria Vergés, prenec part en un collòqui sus eth papèr d’Euròpa en futur der aranés e occitan, amassa damb eth director der Ofici Public Occitan, Esteve Cros.

Ena sua intervencion, era vicesindica metec de manifèst qu’er aranés atrauèsse ua situacion fòrça delicada e que, “tot e qu’era preséncia en espaci europèu dera nòsta lengua serie un objectiu desirable que non cau deishar de costat, aué per aué, es rèptes son en nòste territòri, en qu’er aranés se hèsque present en carrèr e sigue ua lengua viua e parlada”.