Dempús dera reünion que mantenguec ager, 19 d’abriu, eth sindic d’Aran, Carlos Barrera, damb eth President dera Deputacion de Lleida, Joan Reñé, entà analisar eth contengut deth manifèst des Deputacions de Lleida e Huesca sus er èish dera N-230: Lleida- França, pera Val d’Aran, se tractèc de forma mès particulara era redaccion der Estudi Informatiu deth tram: Boca nòrd Tunèl de Vielha- Aubèrt.

En aguest sens gesseren dobtes importants que s’an d’esclarir damb urgéncia, ei per açò qu’eth sindic d’Aran a demanat per escrit mantier ua reünion damb eth cap dera demarcacion de carretères der Estat en Catalonha, Juan José Barios. En aguesta reünion, Carlos Barrera, sindic d’Aran, demanarà informacion sus er auanç des trabalhs de redaccion der Estudi Informatiu deth tram: Boca nòrd Tunèl de Vielha- Aubèrt entà poder auer coneishement deth contengut dera prepausa ena que trabalhe eth Ministèri e es afectacions que se’n poguen derivar des madeishes.

Per ua auta banda, eth sindic d’Aran tanben demanèc ath President dera Deputacion de Lleida qu’es servicis tecnics dera Deputacion assessoren ath Conselh Generau d’Aran ara ora d’avalorar tecnica e paisatgisticament era prepausa deth Ministèri.

Vielha, 20 d’abriu de 2016

Conselh Generau d’Aran: Núria Sanjuan