Vielha, 2 d’octobre de 2017.- Eth sindic d’Aran, Carlos Barrera, arregraïc aué en ròda de premsa eth civisme compartit ager 1 d’octobre tant entàs persones qu’anèren a votar coma pera accion des agents deth còs de Mossos d’Esquadra.
Entath sindic d’Aran era postura deth govèrn espanhòu seguís enrocada e la justifique sonque damb dus mots que son legalitat e Constitucion, e a ja arribat eth moment de substituïr-les pera volontat politica dera negociacion.
Barrera manifestèc qu’eth Conselh Generau d’Aran ei ath costat des institucions catalanes, en tot dar supòrt as persones que resultèren herides ager e es sòns familhaus que sofrissen aguesta situacion.
Malastrosaments, es imatges que s’an viscut perduraràn ena nòsta ment, mès auem d’èster capaci de superar-les damb era convivéncia e era confidança ja qu’i a fòrça ciutadans en tot er estat que comprenen era revindicacion catalana.
En çò que tanh ara participacion, Barrera, expliquèc que non ère facil anar a votar damb un clima tan enrarit e repressiu que, a bon segur que s’era votacion s’auesse desvolopat en circonstàncies normaus era participacion auesse estat mès anautita. Tot açò demòstre qu’i a ua realitat ena societat aranesa qu’a desirs d’exprimí-se, que càmbie e que cau escotar. Entà Barrera, tant eth PP coma UA-PSC e C’s ena Val d’Aran an de préner nòta dera realitat sociau e pensar en plurau, pr’amor qu’aguesta ei era Val d’Aran de present e de futur e benvenguda sigue.
Aute ahèr qu’analisar a compdar deth dia d’ager ei era usurpacion que quauqui partits politics ena Val d’Aran an hèt deth pensament politic de fòrça aranesi. Un baile o un cargue elegit militant d’un partit politic non se pòt apoderar ne representar eth pensament politic des vesins deth pòble o des sòns votants. Non an bric que veir en cas dera Val d’Aran es resultats des eleccions locaus damb eth plantejament dera votacion deth 1 d’octobre.
Entà Carlos Barrera, era Union Europèa non a d’èster unicaments un marc economic e de politiques comunes e sustot d’ua economia globau, tanben a d’èster eth garant dera democracia e dera convivéncia en cadun des sòns estats membres. Es imatges qu’eth mon a vist dera repression der estat espanhòu deuant era revindicacion deth pòble catalan diden pòc dera sua qualitat democratica. Euròpa li calerà soscar sus aguesta matèria pendenta entà non córrer eth risc de sofrir taquicàrdies coma es quaus per sòrt s’an superat damb es resultats des darrères eleccions en França e Alemanha.