Eth sindic dera Val d’Aran desmentís absoludaments que s’age prepausat era celebracion d’un plen extraordinari deth Conselh Generau d’Aran entà tractar eth futur d’Aran dehòra de Catalonha.

Vielha, 27 d’octobre de 2017.- Eth sindic dera Val d’Aran, Carlos Barrera, desmentís absoludaments que s’age prepausat era celebracion d’un plen extraordinari deth Conselh Generau d’Aran entà tractar eth futur d’Aran dehòra de Catalonha.

Eth sindic d’Aran, Carlos Barrera, esclarís que s’a acordat damb eth pòrtavotz dera oposicion en Conselh Generau d’Aran, Sr. Francés X. Boya, era celebracion d’ua reünion eth pròplèu deluns dia 30 d’octobre entàs 16 ores. Ena que tanben s’i convocarà ath pòrtavotz deth PRAG, José Antonio Bruna.

En aguesta reünion, s’analisarà era afectacion dera aplicacion der article 155, e eth possible acòrd de destitucion deth Govèrn dera Generalitat de Catalonha, e des efèctes qu’aguestes mesures auràn ena capacitat de gestion politica deth Conselh Generau d’Aran e der actuau desplegament dera lei 1/2015 de regim especiau d’Aran, atau coma en toti es àmbits qu’eth Govern d’Aran e era Generalitat de Catalonha trabalhen sus eth desvolopament d’aguesta lei.

Era setmana passada damb era fin de disposar en tèrmes juridics de çò que represente era disposicion addicionau 1era dera lei de regim especiau d’Aran, que parle deth dret a decidir deth pòble aranés, se determinèc disposar d’aguesta interpretacion en tèrmes juridics entà esclarí’c, de manèra inequivoca, a tot eth conjunt dera ciutadania dera Val d’Aran, entà evitar dobles interpretacions.