• Eth sindic d’Aran e era vicepresidenta quatau e ministra de Transicion Ecologica e Rèpte Demografic an presentat aué telematicament eth HUB d’innovacion rurau entà zònes de montanha que se plaçarà en Vielha, un projècte pionèr qu’incentivarà era diversificacion economica deth territòri damb ua apòsta clara pera innovacion, era tecnologia e era retencion e atraccion deth talent

Aguest maitin, eth sindic d’Aran, Francés Boya, e era vicepresidenta 4au deth govèrn der Estat e ministra de Transicion Ecologica e Rèpte Demografic, Teresa Ribera, an presidit era presentacion deth HUB d’innovacion rurau entà zònes de montanha que se plaçarà ena Val d’Aran, ua propòsta pionèra entà impulsar era innovacion en territòri.

“Era Val d’Aran vò èster un referent en encastre dera innovacion, era tecnologia e era retencion e atraccion deth talent enes zònes de montanha e era implementacion d’aguest HUB d’innovacion ei un pas fòrça important entà arténher aguest objectiu”, a afirmat eth sindic d’Aran, Francés Boya, en tot híger que: “Eth mon rurau a de besonh impulsar naues iniciatives entà reactivar es activitats economiques des sòns pòbles de montanha, que seguissen era tendéncia d’esdevier lòcs a on era poblacion envielhís e i demore cada còp mens gent joena”.

Pendent era sua intervencion, era vicepresidenta ha destacat eth compromís e volentat de supòrt deth Ministèri entara Transicion Ecologica e Rèpte Demografic damb aguest projècte: “ei immensament estimulant participar en procés d’aguest modèu que servirà entà inspirar modèus de desvolopament fòrça mès diversificadi que mos ajudaràn a recuperar er equilibri territoriau”.

Ribera a enfatizat tanben ena importància “d’escotar es prepauses des joeni ajudant a que desvolòpen es sòns projèctes personaus e professionaus aquiu a on viuen, e compdar damb era participacion de toti es actors deth territòri, en tot apostar per modèus d’innovacion equilibradi qu’entenen era importància deth sòn capitau naturau. Aguesta iniciativa que presentam aué pòt èster ua iniciativa illustradora deth futur responsable, sostenible e equilibrat que toti e totes volem”.

Aguest HUB d’innovacion en zònes de montanha, que se plaçarà en Vielha, serà un espaci a on startups, emprenedors e granes empreses s’amassaràn en tot fomentar eth trabalh collaboratiu, era co-creacion e er aprenedissatge. Un espaci de networking a on generar oportunitats de negòci centrades en mon rurau nacionau e internacionau.

Frut deth debat ciutadan Aran Accion 2020/2030

Eth sindic d’Aran assegure que “eth govèrn deth Conselh Generau d’Aran trabalhe deth prumèr dia ençà dera legislatura entà possar ua estratègia que facilite un procès de diversificacion dera economia aranesa” e atau madeish “aguesta iniciativa a dat pè ath plan de participacion ciutadana Aran Accion 20/30, qu’a definit es rèptes qu’an es empreses e eth territòri en sòn ensem”.

Aguest HUB d’innovacion en zònes de montanha plaçat en Aran darà responsa a quauques des preocupacions manifestades pes ciutadans e ciutadanes qu’an participat en procés de debat Aran Accion 20/30: disposar d’un espaci dubèrt a acuélher empreses e emprenedors que fomenten iniciatives innovadores, qu’analize e estimule era economia deth mon rurau e de montanha e qu’impulse era innovacion enes servicis publics e atencion as persones damb projèctes de valor basadi en principis coma era sostenibilitat, era igualtat, era identitat e era responsabilitat.

Entath Sindic d’Aran “damb aguesta iniciativa de caractèr public-privat, que compde damb eth supòrt deth Ministèri de Transicion Ecologica e Rèpte Demografic, era patronau PIMEC, era associacion d’empresaris Pallars Actiu e empreses d’implantacion nacionau e internacionau, eth Conselh Generau d’Aran pretén establir es bases d’ua economia damb mès valor hijut, que permete as naues generacions retornar entà Aran tà desvolopar projèctes damb impacte en territòri”.