• Era implementacion d’accions que fomenten er usatge der aranés laguens deth còs des Mossos d’Esquadra fomentarien era promocion e normalizacion dera lengua pròpria d’Aran en aguest airau

Eth sindic d’Aran, Francés Boya, s’amassèc era passada setmana damb eth cap dera Prefactura des Mossos d’Esquadra, Eduard Sallent, damb eth cap dera Comissaria Superior de Coordinacion Territoriau, David Boneta, e damb eth cap dera Region Policiau deth Pirineu Occidentau, Miquel Esquius, entà tractar ahèrs relacionadi damb eth còs de seguretat ena Val d’Aran.

En aguesta amassada, s’arribèc ar acòrd de trabalhar ena possible implementacion de diferentes accions entà dar impuls ara lengua aranesa laguens deth còs des Mossos d’Esquadra, çò que supausarie ua important melhora entà dar mès visibilitat ara lengua pròpria d’Aran.

“Era promocion der aranés en diuèrsi airaus ei imprescindible entara sua normalizacion e preservacion”, afirmaue eth sindic d’Aran, en tot híger que: “des deth govèrn deth Conselh Generau d’Aran èm totaument comprometudi ena defensa dera nòsta lengua e era sua implementacion en còs des Mossos d’Esquadra serie un gran auançament e ua fòrça bona noticia entà Aran”.

Ath delà se parlèc tanben dera possibilitat de nomentar ara region policiau deth territòri, “Region Policiau deth Naut Pirenèu e Aran”, atau coma d’un possible distintiu especific entàs Mossòs d’Esquadra deth territòri.