• Eth sindic d’Aran, Francés Boya, e eth president dera Deputacion, Joan Talarn, an mostrat eth sòn compromís a mantier ua estreta collaboracion entre andues institucions pendent era visita deth president ara Val d’Aran, qu’a agut lòc aué

• Pendent era jornada s’an tractat ahèrs de grana importància entà Aran, coma dar responsa as besonhs dera sanitat aranesa, eth supòrt ath retorn deth talent o era melhora dera seguretat dera N-230

Aué a agut lòc era prumèra visita deth president dera Deputacion de Lleida, Joan Talarn, ara Val d’Aran entà conéisher de prumèra man era realitat e es besonhs deth territòri. Ua visita a on s’a metut de manifèst era volentat de refortilhar es ligams entre eth Conselh Generau d’Aran e era Deputacion, en tot renauir eth conveni marc de collaboracion.

Talarn a vengut acompanhat peth vicepresident dera Deputacion, Antoni Navinés, e a estat recebut en Conselh peth sindic d’Aran, Francés Boya, entà ua prumèra amassada ena que s’an tractat ahèrs diuèrsi qu’an a veir damb era collaboracion e cooperacion qu’an mantengut, istoricament ambdues institucions.

“Era Deputacion a agut tostemp un interès especiau damb es tèmes qu’an a veir damb era lengua, era identitat e er autogovèrn d’Aran”, afirmaue eth sindic d’Aran, qu’a volut arregraïr ath president “era disponibilitat e, sustot, era complicitat qu’a damb eth territòri e, especiaument, damb aguesti airaus”.

Pera sua part, Talarn asseguraue que: “aguesta ère ua visita obligada peth reconeishement ara realitat politica e culturau d’Aran entà escotar, compartir e conéisher es besonhs deth territòri”.

Pendent eth maitin, a agut lòc tanben ua amassada damb era totalitat de conselhèrs e conselhères deth plen deth Conselh Generau d’Aran e es alcaldes e alcaldesses des municipis aranesi, a on s’an tractat ahèrs tan importants coma es besonhs dera sanitat aranesa, era grèu problematica de seguretat que patís era N-230 o er auviatge culturau aranés, entre d’auti.

“Auem parlat tanben deth besonh de dar supòrt ath retorn deth talent, as joeni que vòlen retornar tara Val d’Aran un còp acabada era sua formacion enes zònes urbanes. Volem, damb era collaboracion dera Deputacion, establir estrategies que mos permeten aguest retorn deth talent entà reforçar era diversificacion dera economia, qu’en nòste cas ei molt importanta.  Aspiram a que tot aguest talent e aguesta inversion que hèn es familhes pogue repercutir positivament ena societat des nòsti pòbles”, asseguraue Boya.

Entà finalizar era jornada, s’an realizat visites ar Espitau Val d’Aran e eth Palai de Gèu, entà qu’eth president podesse conéisher es besonhs d’aguestes installacions tant importantes entath territòri. E, fin finau, an visitat tanben eth municipi de Bossòst dera man deth tanben deputat provinciau, Amador Marqués.