Imatge d’archiu d’un os nere en 2017

• Aguesta net er os Cachou a tornat a aucir ua cavala adulta en municipi de Vielha e Mijaran, eth cincau atac en sonque dues setmanes

• Deuant eth reiterat comportament predador d’aguest exemplar e era problematica que supause entàs ramadèrs aranesi, eth sindic d’Aran exigís era sua retirada immediata e reclame a totes es administracions que reaccionen e prenen es mesures de besonh

Per cincau còp en 15 dies, Cachou a tornat a atacar en tot aucir ua cavala adulta en municipi de Vielha e Mijaran.

A despièch qu’es Agents de Miei Ambient sagèren de horabandir-lo, atau coma mèrque eth protocòl, damb mesures aversives entà evitar aguest comportament predador, era actuacion non evitèc que Cachou tornèsse a aucir.

“Exigim era extraccion immediata der os Cachou dempús d’aguesti cinc atacs en pòc mès de dues setmanes”, a declarat damb rotonditat eth sindic d’Aran, Francés Boya, que hig: “reclamam a totes es administracions que reaccionen de manèra immediata e que se prenguen es mesures de besonh entà gestionar aguest conflicte qu’afècte de forma dirècta as nòsti ramadèrs”.

Eth Conselh Generau d’Aran insistís tanben en qu’age lòc de forma urgenta era amassada deth grop de trabalh tecnic, qu’a de determinar eth pas ara fasa 3 deth protocòl, qu’ei era captura e extraccion der exemplar.