• Pendent aguesta jornada s’amièc a tèrme tanben ua amassada de trabalh damb eth president dera Communauté de Communes des Pyrénées Haut-Garonnaises, era sous-préfète de Saint-Gaudens e eth cònsul de França en Barcelona, entre d’auti, tà tractar ahèrs relacionadi damb es diuèrsi projèctes de cooperacion transfronterèra entre eth Conselh Generau d’Aran e era Communauté de communes Pyrénées Haut Garonnaises

Eth passat deluns, 25 de noveme, eth sindic d’Aran, Francés Boya, e era conselhèra de Conseishement, Angelina Cases, participèren en acte de commemoracion des 506 ans deth tractat de «Lies e Patzeries» en Fos  e ena amassada de trabalh posteriora damb eth president dera Communauté de communes des Pyrénées Haut-Garonnaises, Alain Castel, era sous-préfète de Saint-Gaudens, Marie-Paule Demiguel, o eth cònsul de França en Barcelona, Cyril Piquemal, entre d’auti.

Ua jornada dedicada ara cooperacion transfronterèra, a on se tractèren es diuèrsi projèctes compartits entre eth Conselh Generau d’Aran e era Communauté de communes Pyrénées Haut Garonnaises.

Entre aguesti projèctes se trapen eth Camin dera Libertat, que met en valor era istòria des nòsti camins coma part fonamentau entara libertat de fòrça judius e judives pendent er Olocaust. En aguesti moments, es trabalhs entath condicionament d’aguesta rota son dejà en execucion.

Pendent aguest ostiu, eth Conselh tanben senhalizèc eth Camin de Sant Jaime Aran-Pirenèu ath sòn pas peth nòste territòri e se trabalhe en projècte RisqHydro entara survelhança dera Garona.

Andús territòris compartissen tota ua sèrie d’objectius comuns relacionadi damb era seguretat ena N-230 e era N-125, que correspon a França, era coordinacion de tot çò qu’a que veir damb es urgéncies e incendis e damb eth desvolopament de projèctes relacionadi damb era sanitat e era atencion ar envielhiment.

Ath delà, vòlen promocionar tanben diuèrsi escambis escolars en matèria de formacion e activitats ludiques.

Tot açò, explique eth sindic d’Aran, “ac volem enmarcar ena creacion d’ua Agropacion de Cooperacion Territoriau Europèa (ACTE), tad aquerò volem signar un convèni marc de collaboracion que mos permeterà auançar ena constitucion d’aguest organisme de caractèr europèu e que possibilitarà, per un costat, trabalhar en toti aguesti projèctes e, ath madeish temps, recéber eth supòrt dera Union Europèa (UE) n’aguest encastre de caractèr transfronterèr”.