• Aguest ei eth prumèr còp qu’eth Conselh Generau d’Aran a representacion en un acte politic internacionau tant important coma era 25au conferéncia climatica dera ONU

• Eth sindic a intervingut en collòqui “Era gestion activa des espacis forestaus coma recurs estrategic entà arténher es objectius climatics e de desvolopament sostenible” en qualitat de president dera Associacion Espanhòla de Municipis de Montanha esMontañas

Eth sindic d’Aran, Francés Boya, en qualitat de president dera Associacion Espanhòla de Municipis de Montanha esMontañas, a participat aué ena COP25, era Cima deth Clima que se celèbre pendent es dies 2 e 13 de deseme en Madrid. Aguesta ei era conferéncia politica tà hèr front ara emergéncia ambientau mès important a nivèu internacionau e, per prumèr viatge, era Val d’Aran compde damb representacion pròpria.

Boya a intervengut ena charrada Era gestion activa des espacis forestaus coma recurs estrategic entà arténher es objectius climatics e de desvolopament sostenible, a on a destacat que “mos trapam deuant deth rèpte mès important dera nòsta civilizacion, un rèpte que mos afècte a toti e totes e mos obligue a impulsar un cambi ena nòsta manèra d’enfocar eth progrés e eth pròpri concèpte de desvolopament”.

Eth govèrn deth Conselh Generau d’Aran ei fòrça implicat damb tot çò qu’a que veir damb era luta contra eth cambi climatic e eth desvolopament deth mon rurau e es municipis de montanha. Pr’amor que, atau coma afirme eth sindic d’Aran: “era montanha, e en especiau es sòns bòsqui, an es esturments e valors de besonh entà ajudar d’ua forma determinant a mitigar es causes e efèctes d’aguesta grèu problematica que patim”.

Ei per aquerò qu’eth govèrn aranés dejà a establit ua linha de trabalh entà hèr dera Val d’Aran un territòri verd de referéncia, en tot implementar projèctes coma eth profitament des recursi naturaus deth territòri, era produccion de biomassa, era conscienciacion deth besonh de recliclar o es ajudes ath pastoralisme, entre d’autes.