Eth president dera Deputacion de Lhèida, Joan Reñé, e eth sindic d’Aran, Carlos Barrera, s’amassèren eth passat deluns dia 23 d’octobre entà avalorar ua prepausa tecnica elaborada peth Conselh Generau d’Aran entara melhora dera N-230 en diuèrsi trams pera Nauta Ribagorça e Aran.

Pròplèuments, era Deputacion de Lhèida convocarà era taula de bailes e representants territoriaus entara melhora dera N-230 damb era fin de concretar ua prepausa tecnica de tot eth traçat, que se li incorporarà entara mencionada anterioraments. Era volontat ei hèr des deth territòri ua prepausa ath Ministèri de Foment.

Pròp de 40 representants d’ajuntaments, conselhs comarcaus, cambres de comèrç e deputacions des territòris de Lhèida e Òsca acordèren en deseme de 2016 un manifèst entà reclamar de manèra conjunta ath Ministèri de Foment ua major seguretat ena N-230 e celeritat enes òbres dera futura autovia A-14.

En çò que tanh ath detalh dera prepausa deth Conselh Generau d’Aran, aguesta sonque hè referéncia as trams dera Nauta Ribagòrça e dera Val d’Aran, e ei basada en melhorar aspèctes religadi damb era seguretat viau e era implantacion en quauqui uns des sòns trams d’un tresau carril d’auançament, damb un pressupòst de 80 milions d’èuros, que tant eth president dera Deputacion de Lhèida coma eth sindic d’Aran ven assumible per part deth Ministèri de Foment.

Hònt: Diputació de Lleida\Conselh Generau d’Aran