• Aguestes comissions se realizen cada an abans dera sason d’iuèrn entà coordinar es accions ena N-230 e ena C-28 en tot melhorar e optimizar recorsi.

Aué diuendres, dia 25 de noveme, s’an celebrat en Conselh Generau d’Aran es comissions de viabilitat des carretères dera N-230 e era C-28 presidida peth sindic d’Aran, Carlos Barrera, e a on an assistit eth baile de Naut Aran, César Ruiz- Canela, eth còsso d’Infraestructures der Ajuntament de Vielha e Mijaran, Jacinto Cuny, eth baile de Bossòst, Amador Marqués, eth baile de Les, Emilio Medan, eth director de montanha de Baqueira Beret, Jordi Cardona, atau coma representants deth Ministerio de Fomento e des còssi de seguretat e emergéncia des Mossos d’Esquadra e Pompièrs d’Aran.

Aguestes comissions se realizen cada an abans dera sason d’iuèrn entà coordinar es accions ena N-230 e ena C-28.

Era empresa encarregada dera limpiesa dera carretèra N-230 compde damb 10 camions e era C-28 dispause de 4 camions e 2 mashines damb fresa entà daurir es carretères de Beret e Bonaigua.

“Era Val d’Aran a de convíuer damb eth sector deth transpòrt, era N-230 ath sòn pas per Aran la transiten ua mieja de 400 camions diaris. Ua des conclusions a estat que des deth Govèrn d’Aran se hèsque era demana ath Ministerio de Fomento qu’entara sason 2017-2018 incremènte era delimitacion oraria ath transpòrt pesat enquiàs 22:00 ores es dimenges e hèstius. Ara per ara ei enquiàs 20:00 ores e açò compòrte que tàs 18:00 ores fòrça camions (ath torn de 80) se desplacen en direccion Lleida- Val d’Aran coincidint sustot en tram mès perilhós Areny- Boca Sud deth tunèl de Vielha damb eth retorn des usatgèrs des pistes d’esquí de Baqueira Beret e de Boí Taüll. Açò compòrte un increment de perilhositat e de risc en aguest tram de carretèra” a manifestat eth sindic d’Aran, Carlos Barrera, qu’a hijut: “Er hèt d’ampliar aguesta demana ath Ministerio de Fomento ei per’mor que part d’aguest tram ei compartit entre Aragon e Catalonha, per tant competéncia deth Ministerio de Fomento e dera Generalitat de Catalonha”.

Eth Ministerio de Fomento construïc eth passat iuèrn en Aubèrt un equipament entath dipòsit de sau e ena comission toti s’an mostrat satisfeti deth sòn usatge per’mor qu’es camions non an d’anar a carregar enquiath dipòsit dera Bòca Nòrd deth tunèl de Vielha en tot redusir eth temps de carrega en ua ora entà tornar a éster operatius en tram Vielha- Baish Aran.

Pera sua part, es bailes de Bossòst e de Les tanben an informat qu’an demanat ath Ministerio de Fomento redusir era velocitat enes nuclèus urbans des sòns pòbles de 50 Km/h a 30 Km/h entath transpòrt pesat.

Vielha, 25 de noveme de 2016

Conselh Generau d’Aran: Núria Sanjuan