• Pendent era amassada mantenguda aguest maitin s’an tractat diuèrsi ahèrs relacionadi damb es servicis publics que s’aufrissen en andús territòris

Eth sindic d’Aran, Francés Boya, e era vicesindica prumèra, Maria Vergés, an recebut aué ena sedença deth Conselh Generau d’Aran ath president dera comarca dera Ribagorza, Marcel Iglesias, entà tractar diferents ahèrs relacionadi damb es servicis publics qu’afècten a andús territòris.

“Pendent aguesta amassada auem parlat d’ahèrs qu’an a veir damb diferents airaus coma son era gestion des emergéncies o era situacion sanitària, mès tanben era mobilitat, pr’amor qu’en aguesti moments era Ribagorza dejà a iniciat es demorades òbres ena N-260 entre Campo e Congosto de Ventamillo, que se demore qu’agen un impacte fòrça positiu en territòri e que son ua mòstra important dera importancia des comunicacions enes zònes de montanha”, afirmaue eth sindic d’Aran, en tot híger que: “entath govèrn deth Conselh Generau d’Aran ei fòrça important mantier ua bona relacion de cooperacion damb es territòris vesins”.

Un aute des ahèrs tractadi a estat era recuperacion deth Camin de Sant Jaime Aran Pirenèus, qu’amasse Toulouse e Saragossa e deth quau dejà s’a finalizat era prumèra fasa de senhalizacion e que pòt supausar un important reclam toristic entàs territòris.