• Eth sindic d’Aran, amassa damb es conselhèrs d’Economia, Torisme e Promocion economica e representants de Foment Torisme Val d’Aran an estat presents aguesti dies ena Hèira Internacionau de Torisme en Madrid

Era Hèira Internacionau de Torisme de Madrid (FITUR) celèbre enguan 40 ans e eth sindic d’Aran, Francés Boya, es conselhèrs d’Economia, Torisme e Promocion Economica, Juan Antonio Serrano e Josep Canut, e diuèrsi representants de Foment Torisme Val d’Aran an estat presents en aguest eveniment qu’ei era referéncia en sector internacionau deth torisme.

En aguesta hèira, que se celèbre pendent es dies 22 e 26 de gèr, s’amassen representants d’un totau de 165 païsi e regions de diferents continents.

“Era Val d’Aran a estat present en FITUR pendent 40 ans e entà nosati supause ua oportunitat fòrça important de poder cercar naui mercats internacionaus e meter-mos en contacte damb eri entà cercar recorsi e èster presents en mès païsi”, afirmaue Juan Antonio Serrano.

Eth sindic d’Aran siguec present ager ena taula de trabalh sus despoblament, comèrç e torisme d’interior damb d’auti expèrts ena matèria. Tanben a participat, coma president dera Associacion de Municipis de Montanha ena presentacion dera capital dera montanha 2020 que enguan serà Ainsa en tot prener releu de Morella.