• Er ahèr mès destacat que s’a tractat ena amassada mantenguda aué en Barcelona, ei eth deth finançament dera sanitat aranesa, que se trape en ua situacion fòrça delicada

Eth sindic e era vicesindica d’Aran, Francés Boya e Maria Vergés, acompanhadi dera directora assitenciau d’Aran Salut, Mª Àngels Borràs, e eth tecnic der airau d’economia deth Conselh Generau, Enrique Pérez, s’an amassat aguest maitin damb era conselhèra deth Departament de Salut dera Generalitat de Catalunya, Alba Vergés. Ua prumèra amassada entà exposar era situacion qu’atrauèsse era sanitat aranesa e es rèptes e dificultats qu’a d’encarar.

Laguens des ahèrs tractadi, eth mès destacat a estat eth finançament dera sanitat aranesa, que se manten en chifres similars as de 2009, tot e auer-se incrementat es servicis qu’aufrís Aran Salut e, ath madeish temps, tot e qu’eth mantenement d’aguest finançament a anat a còsta de qu’eth Conselh Generau d’Aran non creisher-se en recorsi.

Per un aute costat, un aute des punts importants dera amassada a estat era manca de professionaus e mètges especialistes que patís era Val d’Aran. En aguest sens, eth sindic d’Aran a reclamat ara Generalitat qu’establisque es mecanismes de besonh entà facilitar era arribada d’aguesti professionaus en país, ua manca de professionaus que tanben patissen d’auti territòris deth Pirenèu.

“Aran patís n’aguesti moments ua situacion força delicada en matèria de sanitat e resulte indispensable qu’era Generalitat abilite mecanismes tà incentivar era preséncia de professionaus sanitaris en Aran” a manifestat eth sindic.