Vielha, 23 d’octobre de 2017.- Era setzau etapa deth Tour de França 2018 que se disputarà eth 24 de junhsèga entre Carcassonne e Superbagnères de Luchon passarà pera Val d’Aran concrètaments des de Pontaut ena termièra aranesa damb França, en tot seguir per Les e Bossòst e en tot pujar peth Pòrt deth Portilhon, pòrt mitic dera ronda, en direccion entà Luchon. Un totau de 18 km que seràn es unics que i aurà dehòra de territòri francés ena edicion de 2018 dera pròva.

Serà eth tresau còp enes darrèri cinc ans qu’era ronda gala visite era Val d’Aran. Ac hec er an 2006, damb finau d’etapa en Pla de Beret, ena edicion deth 2014 e er an 2016 quan eth Tour de França auec era gessuda dera 9au etapa en Vielha damb fin en Andòrra. Ua gessuda d’etapa qu’acuelhec mès de 25.000 persones e que supausèc un impacte economic de 1,6 milions d’èuros, a partir d’ua inversion per part deth Conselh Generau d’Aran de 130.000€, en tot multiplicar per 12 eth còst dera inversion hèta entà acuélher era gessuda d’etapa deth Tour.

Era despensa es lotjaments pendent era dimenjada deth Tour ena Val d’Aran, siguec d’uns 415.000 èuros, ath temps qu’ena gastronomia e comèrci s’elevèc a 1.175.000 èuros. Pendent es dies adès e posteriors ara celebracion dera etapa es places otelères dubèrtes sigueren deth 83%. Era aucupacion enes otèls arribèc ath 95,5%, enes campings ath 34% e enes cases ruraus ath 54%.

Es corredors dera edicion deth Tour 2018 auràn era oportunitat de passar peth deuant deth monolit en guardader deth Còth de Portilhon en aunor as sèt ciclistes espanhòus qu’an guanhat eth Tour de França, Federico Martín Bahamontes, Luís Ocaña, Pedro Delgado, Miguel Induráin, Óscar Pereiro, Carlos Sastre e Alberto Contador, que ja s’a convertit en un punt de referéncia entà toti es aficionadi ath ciclisme.

Eth pas dera carrèra tanben potenciarà economicaments ara Val d’Aran, donques diuèrses equipes an previst dromir era net deth 24 de junhsèga en Vielha e d’auti pòbles. “Qu’eth Tour passe per Aran tostemp ei ua gran notícia pr’amor alimente era economia dera zòna. Encara que non acuelhem cap gescuda ne finau d’etapa, auem constància que diuèrses equipes an ja reservat abitacions des de hè dus mesi”, apuntèc en declaracions ath jornau Segre era conselhèra de Torisme e Desvolopament Economic d’Aran, Anna Díaz, que dauric era pòrta a tornar a acuélher ua etapa ena Val d’Aran: “Non ac auem demanat dirèctaments mès èm dauridi entàs ans que vien”.