• Eth transpòrt, qu’arribe ara estacion d’esquí Baqueira Beret, ei utilizat pendent era sason d’iuèrn pes esquiaires, un hèt que demòstre era sua consolidacion coma un servici interessant peth sector toristic.

Eth Govèrn d’Aran a trabalhat pendent es darrèri ans entà melhorar es servicis de transpòrt intèrn ena Val d’Aran, ara, quan s’a ja hèt balanç des resultats deth darrèr an, se pòt afirmar qu’es cambiaments que s’an produsit en aguest servici an provocat uns boni resultats. Er increment der an 2013 per çò qu’ei deth 2014 a estat considerable. S’a arribat de 88.400 viatgèrs a 135.480 en 2014. Chifres que mòstren qu’es naui servicis s’an convertit en ua bona opcion entàs visitants qu’arriben ara val, ua bona alternatiua entàs esquiaires que vòlen pujar a Baqueira Beret o entà quinsevolh torista que vò visitar es pòbles d’Aran.

En paraules dera conselhèra de Torisme, Comèrç e Transpòrt d’Aran, Anna Díaz, “aguestes dades confirmen eth trabalh realizat peth Govèrn aranés ena melhora e racionalizacion deth servici deth transpòrt public intèrn dera Val d’Aran”.

Entre es cambiaments mès considerables se tròbe eth sistèma de validacion de bilhets, qu’a facilitat era utilizacion des abonatges. Actuauments s’aufrissen un abonatge mensuau per 22,00€, damb quau se pòden hèr toti es desplaçaments que se volgue damb un periòde de 30 dies. Tanben se pòt crompar era carta T10, damb era quau es bilhets se paguen a 0,90€ cadún en lòc de 1,10€ qu’ei eth prètz deth bilhet simple. Tanben s’an installat pantalhes informatives enes parades entà per’mor de conéisher eth temps de demora e tanben entà auer informadi es viatgèrs se se produsís bèra incidéncia. Era flòta d’autobusi deth servici intèrn dera Val d’Aran ei formada per 5 veïculs naui, retolats enes lateraus damb eth logotip deth Conselh Generau d’Aran.

Enes servicis que da Alsa entre era Val d’Aran e Lhèida e Barcelona tanben s’a implantat ua naua carta era T-10/120 un abonatge que permet ath passatgèr obtier un descompde superior a 50% (Val d’Aran Barcelona per 16,50€ e Val d’Aran Lhèida per 8,00€. Entad aqueri que viatgen mens, Alsa a metut ara venta un abonatge de 5 bilhets.