• En aguesti prumèr an, eth coworking a recebut 72 sollicituds, des quaus 66 an estat persones que i an accedit en periòdes inferiors a 15 dies, e 6 persones an tramitat era sua sollicitud de longa estada e i trabalhen assiduament. I a auut autant persones residentes en Aran, coma persones recentament establides en nòste territòri o que visitauen era Val d’Aran e auien de besonh un espaci a on teletrabalhar

• Aguest espaci ei a disposicion des persones emprenedores, petites empreses, startups o professionaus independents qu’agen de besonh un lòc fisic a on desvolopar es sòns projèctes, en tot compartir idies e crear un hilat que fomente era innovacion en territòri. Es persones interessades, pòden contactar a trauès der email infohepic@aran.org

En mes de junh a hèt un an qu’eth coworking d’HèPic dauric es sues pòrtes. Dempús dera creacion d’aguest Centre d’Innovacion Territoriau, se metec en marcha era configuracion d’un espaci entà que, autant es persones que residissen ena Val d’Aran, coma es persones que mos visiten, podessen disposar d’un lòc de trebalh adaptat as sòns besonhs.

“Aguest espaci ei ua mòstra dera apòsta deth Conselh Generau d’Aran pera creacion, implantacion e expansion de projèctes innovadors e sostenibles damb impacte positiu ena Val d’Aran, e damb era sua implementacion volíem aufrir a persones emprenedores, petites empreses, startups o professionaus independents un lòc fisic a on trabalhar, compartir idèes e materializar eth sòn projècte damb eth supòrt dera administracion”, manifestaue era sindica d’Aran, Maria Vergés.

HèPic ei ua iniciativa deth Conselh Generau d’Aran que gerís era Associacion d’Innovacion en Territòris de Montanha en tot hèr possible ua collaboracion publico privada que dòte de dinamisme aguest Centre d’Innovacion Territoriau.

En aguest prumèr an de trabalh, eth coworking a recebut 72 sollicituds, des quaus 66 an estat persones que i an accedit mens de 15 dies, e 6 persones an tramitat era sua sollicitud de longa estada e i trabalhen assiduament.

“Aguest espaci aufrís un servici qu’a permetut generar dinamiques e sinèrgies entre es persones usatgères, en tot connectar persones de diferents airaus e sectors, e pensam qu’ei un projècte que permet ath nòste territòri a diversificar era sua economia, a progressar e a auançar enquia un futur emprenedor e innovador” asseguraue eth vicesindic e conselhèr de Governacion, Innovacion, Economia e Torisme, Amador Marqués.

Ei important destacar qu’eth coworking d’HèPic a estat un espaci majoritàriaments freqüentat per hemnes trabalhadores. Eth 65,28% deth totau de sollicituds an estat hemnes, e eth 83,33% des sollicituds de longa durada tanben son per part de hemnes.

Se vòs conéisher er espaci e tramitar era tua sollicitud, pòs contactar a trauès der email infohepic@aran.org.