Era naua exposicion en Sant Joan d’Arties (Musèu dera Val d’Aran) s’inaugure aguest diuendres 2 de hereuèr entàs 19 ores

Vielha, 1 de hereuèr de 2018.-  Era glèisa de Sant Joan d’Arties acuelherà ua mòstra de pintura organizada per Musèu dera Val d’Aran (Conselh Generau d’Aran) damb eth supòrt der Institut d’Estudis Ilerdencs (Diputació de Lleida), que compdarà damb ua cinquantea d’òbres de sèt reconeishuts artistes contemporanèus d’origina africana, francesa e espanhòla. Aguesti expausèren conjuntament en 2016 en Niça, en una exposicion de gran resson: Rendez-vous d’Artistes en Negresco.

Enguan, an escuelhut era Val d’Aran sedusits pes caracteristiques d’aguest territòri e cau remercar que moltes des sues òbres an estat creades entà poder-les presentar damb motiu d’aguesta exposicion.

D’influéncies e estils ben diuèrsi, es pintors contemporanèus an eth denominador comun de crear pintura figurativa, hèta damb grana mestria des formes e de tematica familiara entà tot tipe de public.

Stefan Rossouw, neishut en Namíbia, ei un mèstre deth diboish e deth contralum, clarament influenciat per Caravaggio. Stéphane Salle, mètge e pintor emergent, coneish ara perfeccion era anatomia umana e atau ac demòstre enes sues òbres de tematica classica. Tanben centrant era atencion ena figura umana, Jean-Jacques Dumur, Miguel Francisco García-Díez e Christiane Loze, traspassen eth plan fisic entà apregondir enes estats animics e en inconscient. Per un aute costat, Anne-Marie Teisseire s’interèsse pera natura, damb delicadesa e grana mestria des colors. Fin finau, Joan Vilarrubias ei un pintor iperrealista capable de superar toti es detalhs que poirie mostrar ua fotografia.

Era exposicion se poderà visitar deth 3 de hereuèr enquiath 3 de març ena glèisa de Sant Joan d’Arties, de deluns a dissabte de 17 enquia 20 ores.