Vielha, 27 de junh de 2018.- Un an mès, era Fondacion Privada deth Musèu Etnologic dera Val d’Aran organize era exposicion dera sason d’ostiu enquia finaus de seteme. Enguan, “Atau qu’ère, atau qu’èi” da a conéisher era evolucion deth paisatge dera Val, especiaument eth cambi deth nòste territòri a nivèu urbanistic.

A compdar d’un recorrut per toti es pòbles d’Aran, un totau de 132 fotografies meteran de manifèst aguesta evolucion, en tot mostrar eth parallelisme entre 66 fotografies vielhes dera Val (des de 1885 enquias ans 70 deth sègle passat) damb fotografies hètes en 2018 pes membres e collaboradors dera Fondacion.

Coma ja ei abituau, era mòstra expositiva anarà acompanhada pera presentacion deth catalòg dera exposicion e deth nau numero dera revista Tèrra Aranesa.

Era exposicion se poderà visitar a compdar de diuendres 29 de junh enquiath 29 de seteme de 2018 ena glèisa de Sant Joan d’Arties, sala d’exposicions temporaus deth Musèu dera Val d’Aran.

En ostiu, er orari s’amplie de deluns a dissabte, de 17 enquias 21 ores. Era entrada ara exposicion ei gratuïta.