Era exposicion compde damb mès de 200 fotografies, plans e maquetes dera epòca

Eth 14 de junhsèga de 1914 s’inaugurèc eth tramvai dera Val d’Aran entà connectar Marinhac e era sua estacion damb Pònt de Rei (termièra espanhòla).

Aguesta longa linha de lèu 15 km aportèc peth sòn modernisme era prosperitat ara val dera Garona.

Era exposicion torne a mostrar era vida deth tramvai damb es sues maquetes a escala 1/43 es objèctes retrobadi enes bòrdes e cedidi pes abitants dera val. Mès de 200 fotografies, plans e documents i son presenti atau coma videos filmadi en 1949 per un abitant de Fos.

En paraules deth cap de Cultura e Patrimòni d’Aran, Jèp de Montoya, “eth tramvai electric siguec un gran projècte qu’ apropaue era Val d’Aran ara linha ferroviària francesa. Des de Pònt de Rei, a on i auie ua estacion, persones e marchandises, (husta, minerau de zinc e plom entre d’auti) arribauen en Marinhac e des d’aquiu contunhauen eth viatge en tren entà d’auti destinacions coma Paris, a on se manufacturaue part d’aguestes matèries primes araneses”.

Montoya explique “eth projècte hège discórrer era linha en tot remontar era Garona a trauès de Pontaut, Les, Bossòst, Es Bòrdes, Vielha, Arties e Salardú entà arribar en Plan de Beret. Domatge qu’aguest projècte que tustaue ena pòrta aranesa deth Pònt de Rei non siguesse ua realitat e seguraments qu’era Val d’Aran auesse experimentat dejà en aqueri moments dera Revolucion Industriau e dera “Belle Epoque” un progrès mès accentuat, deishant era via ferrea fòrça apròp de Bonabé e d’aquera linha que des de Lleida auie d’arribar en Saint Girons a trauès deth Tunèl deth Pòrt de Salau,…”.

Era exposicion “100 ans deth tramvai de Marinhac ara Val d’Aran” se pòt visitar ena glèisa de Sant Joan d’Arties enquiath 30 de seteme, de deluns a dissabte, de 17h00 a 21h00.