• Mès de 50 mainatges d’Educacion Primària e Segondària, de 6 a 15 ans, participèren laguens des actes dera Setmana Europèa dera prevencion de residus.

• Mès de 25 joguets s’expausen ena bibliotèca municipau de Salardú e en “hall” der Ajuntament de Les enquiath 10 de gèr.

Eth Departament d’Agricultura, Ramaderia e Medi Naturau d’Aran amassa damb er airau de Gestion de Residus deth Conselh Generau d’Aran, organizèren es jornades d’elaboracion d’Ecojoguets (Joguets elaboradi damb materiau reciclat), ara fin de collaborar damb era Setmana Europèa dera Prevencion de Residus.

En paraules deth conselhèr d’Agricultura, Ramaderia e Medi Naturau d’Aran, Jose E. Arró, “era Setmana Europèa dera Prevencion de Residus neish d’un projècte de 3 ans qu’arrecep eth supòrt deth programa LIFE+ dera Comission Europèa. Er objectiu ei organizar pendent ua madeisha setmana e per tota d’Euròpa, accions de sensibilizacion sus era prevencion de residus. En Catalonha se realize damb era coordinacion dera Agéncia de Residus de Catalonha”.

Pendent aguest mes de deseme e enquiath 10 de gèr, eth “hall” der Ajuntament de Les e era bibliotèca municipau de Salardú acuelhen es exposicions d’Ecojoguets que realizèren es mainatges de diuèrses escòles d’Aran pendent era darrèra setmana eth mes de noveme.

Participèren mès de 50 mainatges des escòles Alejandro Casona de Les, Sant Ròc de Bossòst, Loseron d’Arties, e Castèth Leon d’Es Bòrdes d’Educacion Primària e Segondària, de 6 a 15 ans, es joguets èren elaboradi damb materiaus recicladi, que se tròben en nòste entorn e que dejà non s’utilizen (tetrabriks, carton, bosses…) o materiaus que se tròben ena naturalesa.

Eth conselhèr Arró a soslinhat “damb aguest tipe d’accions volem hèr préner consciéncia as mès petiti deth besonh de reciclar e reutilizar es materiaus deth nòste entorn en tot desvolopar era imaginacion e era creativitat en tot elaborar un joguet”.