Vielha, 15 de deseme de 2017.- Aguesta setmana an agut lòc ena Val d’Aran, organizades amassa per Habock Aviation Group e eth Conselh Generau d’Aran, es jornades tecniques intèrnes sus Emergéncies Medicaus e Proteccion Civiu (SAR), qu’an compdat damb era participacion de Pompièrs e Emergéncies d’Aran e deth SABS (Servici Aranés de benéster e Salut).

Era jornada d’inauguracion compdèc damb era preséncia deth sindic d’Aran, Carlos Barrera e deth director responsable de Habock Aviation Group, Jordi Tortras.

Pendent era presentacion des jornades, eth sindic d’Aran, Carlos Barrera, expliquèc qu’ena Val d’Aran es rescats de montanha e es emergéncies urgentes, se resòlven des de hè ans damb era collaboracion de Habock Aviation Group, mès qu’es servicis qu’aufrís aguesta enterpresa en territòri van mès enlà, coma per exemple eth servici de transpòrt de subministrament e recuelhuda de residus des cafeteries de Baqueira-Beret, es intervencions entà cabanes de nauta montanha que realize eth Conselh Generau d’Aran, o ena vessant mès ludica, eth servici de heliesqui, qu’en Espanha sonque se pòt practicar en Baqueira.

Pera sua part, Jordi Tortras, destaquèc que quan pensèren en organizar aguestes jornades en madeish moment pensèren ena Val d’Aran, a on an artenhut desvolopar un modèl de gestion publica-privada que foncione fòrça ben e qu’ei fòrça dificil de repetir en cap aute lòc.

Es jornades tecniques intèrnes sus Emergéncies Medicaus e Proteccion Civiu (SAR), an consistit en diuèrses ponéncies e taules de trabalh damb era participacion des agents que s’aucupen des diuèrses prètzhèts d’emergéncies medicaus e proteccion civiu en elicoptèr coma son es pilòts, gruistes, rescataires e sanitaris, procedenti des bases d’accion de Habock Aviation Group en Catalonha, Astúrias, País Basc, Valladolid e Pamplona.

Er objectiu a estat entre d’auti, era integracion de totes es operacions a on participe Habock Aviation Group, era creacion d’ua comission tecnica de naui procediments e materiaus entà sométer melhores e méter en comuna es protocòus de trabalh sustot en rescats de montanha, damb era fin de poder estandarizar es procediments que s’an prepausat enes diuèrses taules tecniques e comissions.

Es jornades an includit un simulacre d’actuacion en situacion d’emergéncia a cargue deth Grop de Rescat de Montanha (GRM) des Pompièrs d’Aran, damb era participacion deth nau elicoptèr de Habock Aviation Group Airbus KC-145, eth SABS (Servici Aranés de Benéster e Salut) e Mossos d’Esquadra, eth passat dimèrcles 13 de deseme ena poblacion d’Arres.