• Eth sindic d’Aran s’amassaue aguest dimars en Madrid damb eth director generau de Carretères, Javier Herrero, entà tractar eth condicionament e seguretat dera N-230, en aguesta amassada eth Ministèri de Foment informèc dera sua decision d’iniciar un nau estudi informatiu

• Aguesta decision implique, atau coma reclamèren es ajuntaments aranesi, eth Conselh Generau, era Deputacion de Lhèida e era Generalitat enes allegacions presentades deuant era anterior propòsta deth ministèri, estudiar integraument tot eth traçat des dera boca nòrd deth Tunèl de Vielha enquiara frontèra francesa

• Er increment deth trafic pesat e era precarietat de quauqui trams exigís ua actuacion que garantís era seguretat e ues milhors condicions entàs usatgèrs d’aguesta via, atau coma era seguretat enes poblacions afectades peth traçat

Deuant era problematica entara seguretat que supause er estat dera N-230, eth sindic d’Aran, Francés Boya, mantenguec eth passat dimars, 17 de seteme, ua amassada damb eth director Generau de Carretères, Javier Herrero Lizano, entà tractar eth condicionament d’aguesta via en tram que va des dera boca nòrd deth Tunèl de Vielha enquiara frontèra francesa.

Cau rebrembar qu’eth Ministèri de Foment aprovèc dejà provisionaument un estudi informatiu que siguec sometut a informacion publica e deuant eth quau eth Conselh Generau d’Aran, era Generalitat, era Deputacion de Lhèida e es ajuntaments aranesi presentèren allegacions conjuntes ath considerar qu’es opcions deth traçat non èren es mes adequades, non s’ajustauen ath territòri e non se minimizauen sufisentaments es impactes païsatgistics e socioeconomics d’un territòri coma era Val d’Aran.

En vista der expedient d’informacion publica, era Direccion Generau de Carretères deth Ministèri de Foment, segontes a informat ena amassada mantenguda damb eth sindic d’Aran, a resolvut dar per concludit er estudi informatiu actuau que compren eth condicionament dera N-230 entre era boca nòrd deth Tunèl de Vielha e Aubèrt, e està premanint er orde der estudi que servís entà iniciar un nau estudi informatiu, qu’agranisque er encastre deth madeish peth sòn limit enquiara frontèra francesa.

Eth sindic a mostrar era sua “satisfaccion pera oportunitat que supause començar, damb maxima celeritat, aguesti estudis prèvis e poder trabalhar ena definicion deth traçat”.

Ath delà, a precisat qu’eth Conselh Generau realizarà un seguiment exaustiu d’aguest procés e collaborarà damb eth ministèri enes estudis ambientaus e païsatgistics. En aguest sens, a afirmat: “mos amassaram enes pròplèus dates damb eth cap dera Demarcacion de Carretères der Estat en Catalonha, Luis Bonet, entà meter-mos a disposicion der equip redactor”.

Abantes d’auer er equip redactor, s’a d’aprovar er orde der estudi deth nau estudi informatiu, en elaboracion, licitar eth contracte de servicis entara sua redaccion, adjudicar e formalizar eth corresponent contracte.