• Eth Sagèth de Torisme Familhar, eth Certificat Biosphere, e era dubertura d’Aran Park damb er hijut dera experiéncia Wild Life, son es principaus nauetats

• En 2013 a aumentat eth nombre de visitants estrangèrs, a on França seguís coma era principau destinacion d’origina

Eth patronat de torisme dera Val d’Aran, Foment Torisme Val d’Aran (FTVA), a presentat era memòria sus es accions amiades a tèrme pendent er exercici 2013. En aguest acte, era conselhèra de Torisme, Comèrç e Consum deth Conselh Generau d’Aran, Anna Diaz, a hèt ua revision de totes es mesures realizades per FTVA.

En aguest acte s’an expausat es principaus nauetats amiades a tèrme pendent er an 2013. D’ua banda, era Val d’Aran siguec premiada damb eth sagèth de Torisme Familhar per part dera Federacion Espanhòla de Familhes Nombroses. 2014 ei er an internacionau des familhes nombroses, e era Val d’Aran, destaque entà aufrir un ample ventalh d’activitats dirigides ath torisme familhar. D’auta banda, tanben s’obtenguec eth certificat Biosphere Destination, de mans dera UNESCO e dera Organizacion Mondiau de Torisme, qu’arreconeish eth trabalh que se realize des dera Val d’Aran en favor d’ua gestion responsabla e sostenible deth torisme. D’aguesta manèra, se convertís ena prumèra destinacion de montanha a artenhé’c. E, fin finau, 2013 siguec er an de dubertura deth parc de fauna e flòra Aran Park e tanben s’implementèc era activitat coneishuda coma Wild Life, entàs amants des espècies sauvatges dera Val d’Aran.

“Er an 2013, maugrat es problèmes damb es aiguats, a estat un gran an, pr’amor qu’auem pogut desvolopar diuèrses activitats que mos placen coma era destinacion toristica de montanha preferida en Estat Espanhòu”, a comentat Anna Díaz.

“Des de Foment Torisme Val d’Aran volem arregraïr a toti es empresaris deth territòri entà auer-mos ajudat a arténher es diferentes reconeishences, pr’amor que mercés ada eri era Val d’Aran ei era destinacion preferida de mès en mès gent der Estat Espanhòu atau coma des visitants que vien der estrangèr”, a hijut Díaz.

En aguest sens, era Val d’Aran eth 2013 a melhorat es sues chifres de visitants que provien de dehòra der Estat Espanhòu per çò qu’ei der exercici 2012. Ath delà de visitants francesi, que seguisen coma es principaus visitants forans, i a un aument considerable de toristes que provien de Gran Bretanha, atau coma d’auti païsi coma Israèl.

Per çò qu’ei d’Espanha, es principaus destinacions d’origina contunhen d’èster Catalunya, Madrid, País Basc e Valéncia.

Eth pressupòst finau entad aguesta darrèra anualitat siguec de 606.000€, a on lèu de 410.000€ hèn part deth pressupòst qu’autrege eth Conselh Generau d’Aran en concèpte de transferéncia dera competéncia de torisme dera Generalitat de Catalunya. Era rèsta ven dera partida dera taxa toristica e dera aportacion des sòcis de FTVA. Coma mesura excepcionau, entàs exercicis 2013 e 2014, era Val d’Aran a artenhut qu’era Generalitat li cedisque 100% dera recaptacion dera taxa toristica que se recuelh en territòri, entà poder melhorar es condicions païsatgistiques dempús des aiguats deth passat mes de junh, e entara promocion toristica dera destinacion.