• Eth Conselh Generau d’Aran inicièc aguest servici eth passat 1 d’abriu damb er objectiu de prestar atencion a persones granes, damb dependéncia, damb besonhs puntuaus o familhes monoparentaus enes sues viuendes entà que poguen demorar en sòn entorn abituau e arténher atau eth sòn maxim nivèu de vida, benèster e autonomia
• Eth servici, qu’arrinquèc damb 15 usatgèrs en abriu, compde ja damb 37 persones atengudes

Eth Servici d’Atencion en entorn Domiciliari (SAeD) impulsat peth Conselh Generau d’Aran a trauès d’Aran Salut a passat des 15 persones iniciauments atengudes ena sua metuda en foncionament eth passat 1 d’abriu, enquiàs 37 actuaus.

Pendent aguesti quate mesi s’an iniciat dejà naues activitats laguens d’aguest servici coma es minjars a domicili o eth banc d’ajudes tecniques, per miei deth quau se facilite un prèstec d’esturments tecnics (cagires de ròdes, caminadors, lhèts articuladi, grues…) as usatgèrs e usatgères deth servici. Enquiara, s’an assignat 6 esturments d’ajuda tecnica a 7 persones beneficiàries deth servici. Actuaument, se trabalhe entà desvolopar encara mès era cartera que desplegarà d’auti servicis complementaris coma era valoracion de teràpia ocupacional o un espaci sociau comun ena Residéncia de Vielha a on poder desvolopar activitats conjuntes damb es residents.

Eth SAeD ei un servici universau e gratuït impulsat peth Conselh Generau d’Aran que prèste atencion a totes es persones en quinsevolh etapa dera sua vida qu’agen de besonh aguest tipe d’ajuda en sòn domicili, damb er objectiu de contribuïr ara melhora dera sua salut e eth benèster e dera deth sòn entorn familhar e sociau e entà evitar espitalizacions e institucionalizacions que non siguen de besonh.

Entara sindica d’Aran, Maria Vergés, “deth govèrn deth Conselh Generau d’Aran èm fòrça satisfèti der èxit d’aguest programa pr’amo qu’er increment de persones usatgères deth SaeD mos demòstre qu’èra un servici fòrça de besonh en territòri” en tot híger que “ era sua metuda en foncionament mèrque un abans e un dempús ena atencion as persones ena Val d’Aran, pr’amor que, ath delà d’èster gratuït ja que consideram qu’ei un servici essenciau tara ciutadania dera madeisha forma que n’ei era assisténcia sanitària, permet hèr un gran pas entà consolidar era proximitat e nivèu de prestracions que volem impulsar en Aran”.

Cau rebrembar que pòden èster beneficiàries deth SAeD totes aqueres persones e unitats de conviuença empadronades en Aran e que requerissen ua avaloracion dera sua situacion en entorn domiciliari: persones en situacion de dependéncia, persones fragiles o vulnerables que viuen soletes o acompanhades mès damb supòrt limitat, persones damb besonh de supòrt deuant d’ua situacion sociau o sanitària subervenguda, persones isolades o en risc d’isolament, persones damb tractament medic o terapeutic que requerissen seguiment, persones en situacion d’urgéncia e/o emergéncia subervenguda. Es persones interessades en aguest servici pòden adreçar-se as sòns mètges de capçalera o as professionaus der airau sociau d’Aran Salut.