Dissabte passat, 20 de hereuèr, en Espot comencèc ua excellenta dimenjada entara equipa d’U16 deth Club Aranés d’Espòrts d’Iuèrn (CAEI). Era climatologia perfècta, es corredors en forma e concentradi, siguec era combinacion perfècta entà arténher uns grani resultats damb 5 podiums de 12 possibles.

Eth dissabte se disputèc era pròva d’Eslalom ena pista Estadi, ua pista exigenta e damb nhèu compacta. En hemnes, Carlota Pomes, artenhec era prumèra posicion en tot mostrar un esquí fòrça solid. Inés Torné demorèc dusau a 0.84 damb dues bones manges fòrça trabalhades. Per un aute costat, en òmes, eth corredor deth CAEI, Gabriel Gutiérrez artenhec un dusau lòc, damb ua grana dusau manja ena quau remontèc 3 lòcs.

Eth dimenge, 21 de hereuèr, gessec un aute dia damb solei en Espot, perfècte entà disputar eth Gigant ena 2, ua pista damb un mur fòrça accentuat e era nhèu duríssima, s’exigie maximala concentracion per part des corredors entà pr’amor d’auer un bon nivèu. En hemnes, Ana Vidaor artenhec un meritori prumèr lòc damb ua dusau manja d’infart! En òmes, Gabriel Gutiérrez, finalizèc tresau damb dues manges fòrça solides en tot mostrar un esquí fòrça segur e eficaç.

Vielha, 24 de hereuèr de 2016

Conselh Generau d’Aran: Núria Sanjuan

Hònt: CAEI