• Era candidatura de Vergés, presentada peth govèrn deth Conselh Generau d’Aran, a estat escuelhuda entre d’autes onze pr’amor dera sua longa trajectòria coma militant actiu dera lengua e cultura d’Aran, autant coma per èster un referent en impuls, ensenhament e estudi der aranés

Era Generalitat de Catalunya a autrejat eth 6au Prèmi Robèrt Lafont ar illustre aranés Frederic Vergés Bartau pera sua longa trajectòria ena promocion dera lengua d’Aran. Er acte d’entrega d’aguest reconeishement ei previst entath mes de noveme d’enguan en Palau dera Generalitat.

Era candidatura de Vergés, presentada peth govèrn deth Conselh Generau d’Aran, a estat escuelhuda entre d’autes onze presentades per institucions, universitats e era participacion ciutadana dubèrta.

Rebrembam qu’eth Prèmi Robèrt Lafont, concedit peth departament de Cultura dera Generalitat de Catalunya, a coma objectiu reconéisher e premiar as persones o entitats que s’agen distingit pera defensa, projeccion e promocion dera lengua aranesa e occitana en totes es sues variants, en quinsevolh punt deth domini lingüistic.

Eth sindic d’Aran, Francés Boya, a afirmat que Vergés “merite aguest reconeishement per nombrosi motius, especiaument pr’amor qu’a estat, ei e serà eth referent de fòrça generacions en impuls, ensenhament e estudi der aranés, mès tanben pera sua categoria umana que li a hèt a estimar eth sòn país e era sua lengua e cultura, transmetent es coneishements e valors a totes es persones qu’an agut eth plaser de coneisher-lo”.