Vielha, 27 de hereuèr de 2018.- Eth sindic d’Aran, Carlos Barrera e eth secretari d’Infrastructures e Mobilitat deth departament de Territòri e Sostenibilitat dera Generalitat, Ricard Font, mantengueren ua reünion ena sedença deth departament eth passat diuendres entà tractar aspèctes restacadi damb era carretèra N-230.

Eth sindic d’Aran, liurèc ath secretari d’Infrastructures e Mobilitat er estudi presentat ara Deputacion de Lhèida atau coma ath rèste d’ajuntaments afectadi peth traçat dera carretèra N-230, elaborat peth Conselh Generau d’Aran entàs melhores d’aguesta carretèra des deth Pas d’Aran enquiara boca sud deth tunèl de Vielha.

Eth sindic e eth secretari d’Infrastructures, acordèren qu’eth departament de Territòri e Sostenibilitat e eth Conselh Generau d’Aran, presentaràn allegacions conjuntes ar estudi informatiu e d’impacte ambientau deth tram de 45 quilomètres entre Sopèira (Òsca) e era boca sud deth tunèl de Vielha elaborat peth Ministèri de Foment que se tròbe en periòde d’informacion publica enquiath dia 8 de març.

Entre d’auti aspèctes, Conselh e Generalitat demanaràn ath Ministèri de Foment ahíger ar estudi de melhores dera carretèra eth tram que va des deth quilomètre 96’5 (Pas d’Aran) enquiath 107 (Sopèira) qu’er estudi deth Ministèri dèishe dehòra d’aguestes melhores.

Er estudi deth Ministèri de Foment contemple era melhora deth tram mès perilhós dera N-230, entre era localitat aragonesa de Sopèira e era boca sud deth tunèl de Vielha, avalorat en 295 milions d’èuros. Per contra eth territòri considère qu’era opcion mès avienta entà resòlver era actuau problematica d’aguest tram dera carretèra N-230 ei era alternatiua 1 deth Ministèri de Foment avalorat en 363.500.000 €.

Auta des peticions per part deth Conselh Generau d’Aran ei arténher eth supòrt dera Generalitat as allegacions presentades des d’Aran. Eth sindic d’Aran, tanben li confirmèc ath secretari d’Infrastructures e Mobilitat qu’eth Conselh Generau darà supòrt as allegacions presentades peth rèste de municipis afectadi, pr’amor qu’aguesta problematica ei era quau a motivat er estudi deth Ministèri de Foment, e ei comun a toti.