• Entà garantir era dubertura e bon foncionament deth Refugi de Colomèrs, que fomente un torisme de montanha respectuós damb eth miei ambient ath temps qu’esdeven un agent dinamizador deth territòri, eth Conselh Generau d’Aran a tret a licitacion er arrendament d’aguest equipament, es aufèrtes poiràn presentar-se enquiath 22 de noveme

Eth Conselh Generau d’Aran a dubèrt eth procès de licitacion d’arrendament deth Refugi de Colomèrs entara sua gestion e explotacion. Eth valor estimat deth contracte ei de 400.000 € e era durada iniciau deth contracte ei de 8 ans, damb possibilitat de prorogacion de 8 ans mès.

Es persones interessades poiràn visitar es installacions eth pròplèu deluns, 30 d’octobre entàs 11:00 ores e poiràn presentar es sues aufèrtes enquiath 22 de noveme de 2023 tàs 23:59 ores.

“Colomèrs ei un des endrets emblematics deth nòste territòri, que recep un gran nombre de visitants ath long der an. Eth foment d’aguest torisme de montanha, respectuós damb eth miei ambient, ath temps qu’esdeven tanben un agent dinamizador de prumèr nivèu, ei un des èishi de trabalh deth govèrn d’Aran en matèria toristica”, asseguraue era sindica d’Aran, Maria Vergés.

Atau madeish eth conselhèr de Governacion, Innovacion, Economia e Torisme, Amador Marqués, afirmaue que: “assegurar era dubertura e bon foncionament d’aguest equipament deth Conselh Generau d’Aran ei essenciau entà garantir aguest torisme de montanha”.

Eth govèrn d’Aran a volut tanben arregraïr e reconéisher eth trabalh deth responsable deth refugi pendent es darrèri ans.

Tota era documentacion ei disponible ena Plataforma de Servicis de Contractacion Publica:

https://contractaciopublica.cat/ca/detall-publicacio/200158710