• Eth Ministèri de Transpòrts, Mobilitat e Agenda Urbana a anonciat aué era adjudicacion dera redaccion deth projècte de condicionament dera N-230 entre era boca nòrd deth Tunèl e Vielha

• Aguest anonci arribe pògui mesi dempús qu’eth Ministèri anoncièsse era aprobacion der estudi informatiu deth condicionament dera N-230 en aguest tram, e respon ath compromís der Estat tara melhora d’aguesta carretèra, atau coma manifestèc eth passat mes de seteme eth secretari generau d’infraestructures der Estat ena sua visita tath Conselh Generau d’Aran

• Eth govèrn d’Aran mòstre era sua satisfaccion pes rapids auanci ena melhora d’aguesta carretèra tant reclamadi peth territòri

Eth Ministèri de Transpòrts, Mobilitat e Agenda Urbana (Mitma) a adjudicat eth contracte de servicis entà redactar eth projècte “Condicionament dera carretèra N-230 mejançant era ampliacion de plataforma e estudi dera implantacion de carrils adicionaus d’adelantament. Tram: Boca Nòrd deth Tunèl Juan Carlos I – Vielha”, per 830.000 €.

Er objectiu deth projècte serà desvolopar es actuacions de besonh entà melhorar era seguretat viau d’aguest tram de 6 km, per miei dera ampliacion dera sua plataforma enquia arténher ua via de 7 mètres d’amplada damb acotaders d’1 mètre e cuneta longitodinau de seguretat adosada, artenhent era maxima integracion ambientau des elements foncionaus dera carretèra.

Ath delà, s’estudiarà era possibilitat d’establir carrils addicionaus d’adelantament enes trams mès aptes. Es trabalhs de melhora se complementaràn damb eth dessenh dera reabilitacion estructurau deth fèrm qu’ac age de besonh, er estudi dera implementacion d’espacis entà frenar e un sauva-lauegi que substituisque er actuau.

Aguesta actuacion forme part dera agenda d’actuacions entà melhorar era N-230 entre Almenar e Pònt de Rei e respon a ua demana istorica autant dera Val d’Aran coma dera rèsta de territòris que trauèsse era via. Era “Agenda N-230” siguec presentada peth secretari generau d’infraestructures der Estat, Xavier Flores, ena sedença deth Conselh Generau d’Aran eth passat mes de seteme, en un acte qu’evidencie eth compromís der Estat damb aguesta carretèra.