Eth passat dimenje, Foment Torisme Val d’Aran, organizèc ua naua edicion d'”Era Òlhada”, er eveniment gastronomic dedicat a un des plats tipics dera Val d’Aran: era òlha aranesa. Aguesta jornada se celebrèc en Plan de Beret, e compdèc damb era participacion dera Escòla d’Ostalaria de Les coma encargat de codinar aguest plat.

Entà poder degustar era òlha aranesa, se veneren tiquets per 3€. Ara fin se veneren près de 500 tiquets de degustacion, en tot confirmar era capitada d’acuèlh qu’auec er eveniment. En tot profitar eth bon temps que hec pendent aguesta jornada, fòrça gent que se trobaue ena estacion d’esquí de Baqueira Beret s’apropèc ar eveniment.

“Un còp mès podem èster satisfèts peth resultat qu’auem obtengut en aguesta naua edicion d’Era Òlhada, donques qu’es 500 tiquets que se veneren, demòstre qu’era gent ei concienciada en conéisher era gastronomia deth nòste territòri”, comentèc era conselhèra de Torisme, Comèrç e Consum, Anna Díaz.

En aguest eveniment tanben siguec representada era Mèrca de Garantia, eth certificat des productes autoctòns dera Val d’Aran, damb era preséncia dera Tocineria Casasnovas, qu’aufric era degustacion de patè. Ath delà, tanben se compdèc damb era participacion dera mèrca de vin Principe de Viana, Denominacion d’Origina de Navarra, qu’aufric ua mòstra deth sòn vin.

“Volem arregraïr a totes es entitats que participèren amassa damb Foment Torisme Val d’Aran en aguest eveniment gastronomic, peth sòn esfòrç, donques qu’ara fin tanben son partícipes dera capitada assolida”, soslinhaue Díaz.