• Pendent era setmana deth 17 ath 23 de mai, es mès de 115 persones inscrites ad aguesta campanha an artenhut eth rèpte de remassar 2.000 residus des montanhes dera Val d’Aran

Era campanha ‘Hè un pensament’, organizada peth Conselh Generau d’Aran, amassa damb er Ajuntament de Vielha e Mijaran, e es associacions Aran pera Natura e Nomad Reels, e qu’a compdat damb eth supòrt e collaboracion de fòrça entitats e associacions deth territòri, a estat tot un exit de participacion.

“Deth govèrn deth Conselh Generau d’Aran ençà èm fòrça satisfeti dera acuelhuda dera campanha e era implicacion des persones qu’an participat, fòrça d’eri mainatges e mainades, as qui volem dar es gràcies e felicitar-les per esfòrç amiat a tèrme”, asseguraue eth conselhèr de Territòri, Paisatge e Gestion Ambientau, Oriol Sala, en tot híger que “auem complit damb er objectiu d’aguesta campanha, qu’ère, entre toti e totes, mantier es nòstes montanhes e camins nets e liures de lordèra e conscienciar deth besonh de conservar e protegir era nòsta natura”.

Un totau de 115 persones s’inscriuèren en aguesta campanha e entre toti e totes s’a artenhut eth rèpte dera app Literatti, qu’ère conseguir remassar 2.000 residus des camins e montanhes d’Aran.