Era preinscripcion tath Nivèu C1 d’aranés que començarà en gèr deth 2019 s’a agut de barrar pr’amor qu’en mens de dètz dies s’a arribat ath nombre maxim d’alumnes que pòt acuélher tà que sigue un cors profitós e tanben, auent en compde er espaci fisic a on s’impartiràn es classes, que non admet mès de 30 persones.

Eth darrèr cors de Nivèu D, ara nomentat C1, s’impartic pendent eth cors 2013-14. Aguest nau cors, es contenguts deth quau son elaboradi peth professor Jordi Suïls, membre dera Catedra d’Occitan dera UdL (Universitat de Lhèida) s’impartirà a compdar deth mes de gèr deth 2019 e es classes seràn es dissabtes 19 de gèr, 9 de hereuèr, 2 e 23 de març, 6 d’abriu, 4 e 25 de mai de 9 a 14 h. Eth dijaus, 27 de junh e eth diuendres, 28 de junh de 15 h a 20 h dera tarde e er 1,2 e 3 de junhsèga de 9 a 14 h.

Eth temari deth Cors compren coneishements auançadi d’ortografia, gramatica, Literatura occitana e especificament aranesa, elaboracion de documents administratius, coneishement Generau des autes variantes dialectaus der Occitan…

Damb aguest Nivèu se preten dar continuacion ath Nivèu B2 (antic C) qu’enquia ara ère eth Nivèu mès auançat, de manèra qu’es persones que ja agen artenhut aguest nivèu poguen aquerir un grad mès naut de coneishements dera lengua a toti es nivèus.

Vielha, 27 de noveme de 2018

Conselh Generau d’Aran: Núria Sanjuan

Hònt: Departament de Cultura e Lengua