• Pr’amor qu’eth dissabte, 5 de març, mès de 200 persones se demorèren sense poder veir eth documentau, eth dimenge, 6 de març, se realizèc ua auta projeccion.
Era dimenjada passada s’estreèc ena Val d’Aran “Drop in a Life”, documentau sus era vida esportiua deth rider aranés, Aymar Navarro Combalié.
Era estrea auec ua responsa massiva dera gent, eth dissabte, 5 de març, mieja ora abans de començar era projeccion deth documentau era Audiovisuau de Vielha ja ère plea e mès de 200 persones se demorèren as pòrtes de poder entrar.
Per aguesta rason se decidic realizar ua auta projeccion eth dimenge, 6 de març, en un coneishut Pub dera Val d’Aran, eth quau se tornèc a ramplir enquia arribar en aforament complèt e barrèren nauaments es pòrtes.
Er acte compdèc damb era preséncia dera conselhèra de Torisme e Desvolopament Economic d’Aran, Anna Díaz e deth conselhèr de Territòri d’Aran, Jose A. Boya, que manifestèren eth sòn supòrt e admiracion cap a Aymar.
Pròximament s’estrearà eth documentau “Drop in a life” Online.
Aymar Navarro a manifestat “sò fòrça erós que i age tanta gent interessada en veir çò que hèsqui e çò que me dediqui, ei ua motivacion extra entà contunhar creishent e credent”.
Eth documentau de 50 menutes, ac a realizat BumpyFilms e compde damb aportacions d’amics e familhars que parlen e opinen sus era trajectòria esportiua d’Aymar, anecdòtes,… damb imatges d’aguesti darrèri 5 ans.
Aymar Navarro, signèc un convèni damb eth Conselh Generau d’Aran e Foment Torisme Val d’Aran entà promòir era destinacion toristica esportiua Val d’Aran peth mon, representada ena imatge e enes valors deth rider aranés.
Trailer de “Drop in a Life” d’Aymar Navarro en:
https://www.youtube.com/watch?v=2vHQaaj_0ZM
Vielha, 8 de març de 2016
Conselh Generau d’Aran: Núria Sanjuan