• Es Pompièrs d’Aran an amiat a tèrme un totau de 30 rescats damb er elicoptèr dera Val d’Aran pendent es mesi de junh, junhsèga e agost d’enguan

• Eth govèrn deth Conselh Generau d’Aran licitèc eth passat mes de junh es servicis d’un elicoptèr e dus pilòts entà agilizar era responsa des Pompièrs deuant aguest tipe d’emergéncies

Eth còs de Pompièrs d’Aran a amiat a tèrme pendent es mesi de junh e agost un totau de 30 rescats en diferents airaus de montanha damb eth servici d’elicoptèr dera Val d’Aran. D’aguesti 30 rescats, 1 d’eri s’amièc a tèrme en junh, 13 en junhsèga e 16 en agost. Pendent eth mes de junh, ath delà, s’amièren a tèrme es practiques e abilitacions qu’estipule era normativa aeronautica.

“Era Val d’Aran ven de víuer era melhor tempsada d’ostiu des darrèri 30 ans e aguesta nauta afloéncia de persones a supausat tanben un increment des servicis de rescat de montanha per part deth nòste còs de Pompièrs, a qui cau arregraïr eth sòn gran trebalh de gestion des emergéncies ena montanha e era sua rapida responsa e agilitat en aguesti casi”, afirmaue era sindica d’Aran, Maria Vergés.

En aguest sens, cau rebrembar qu’en mes de junh eth Conselh Generau d’Aran licitèc un contracte de noliejament d’un elicoptèr e eth servici de dus pilòts entà facilitar qu’es Pompièrs poguen amiar a tèrme damb major agilitat aguest tipe de rescats.

“Enquia alavetz, quan ère de besonh amiar a tèrme un rescat en zònes de montanha dera Val d’Aran, mos calie depéner dera disponibilitat des elicoptèrs de Bombers dera Generalitat, çò que supause un temps de demora fòrça mès elevat que dificulte eth trabalh des nòsti Pompièrs e aumente eth risc de qu’es victimes patisquen maus majors”, explicaue era sindica d’Aran, en tot híger que: “ei pr’amor d’açò qu’eth govèrn d’Aran decidic contractar es servicis d’un elicoptèr e dus pilòts entà minimizar eth temps de responsa deuant des accidents de montanha e agilizar eth trabalh des Pompièrs”.

Aguest contracte s’alongarà enquiath 31 de gèr de 2022 e non se descarte tornar-lo a licitar tar an que ven s’er accès as mieis e equipaments qu’era Val d’Aran a de besonh non melhoren.