• Eth cors, damb ua durada de 40 ores, compdèc damb era participacion de 36 persones.

• Deuant era bona acuelhuda qu’a agut eth cors, eth Conselh Generau d’Aran preve era celebracion d’ua naua edicion entath pròplèu an 2016.

Pendent es dies 13, 14, 16 e 17 de noveme, organizat peth Conselh Generau d’Aran, se realizèc un cors gratuït de formacion de guides/interprèts deth patrimòni aranés. Un totau de 36 persones participèren en aguest cors, bèra d’eres guides professionaus, d’autes dedicades a activitats relacionades damb era ostalaria, estudiants o simplement persones interessades en ampliar es sòns coneishements sus eth patrimòni dera Val d’Aran.

Eth cors, abordèc, des d’ua vision integrau, aspèctes diferenti apertenenti ath patrimòni, naturau o culturau dera Val d’Aran, damb classes teoriques e bères visites a bens integrants d’aguest patrimòni. Es classes teoriques se realizèren enes installacions dera Escòla de Tecnics Esportius dera Val d’Aran (ETEVA). Es classes sigueren impartides per tecnics des airaus de Patrimòni Culturau, de Miei Ambient e deth Centre de Prediccion de Lauegi deth Conselh Generau d’Aran. Tanben compdèren damb ua conferéncia a cargue dera istoriadora der art e gran coneishedora der art medievau dera Val d’Aran, Carla del Valle.

Deuant dera bona responsa qu’a agut eth cors, eth Conselh Generau d’Aran, preve era celebracion d’ua naua edicion entath pròplèu an 2016.