• Aguesta campanha, organizada peth Conselh Generau d’Aran, amassa damb er Ajuntament de Vielha e Mijaran, e es associacions Aran pera Natura e Nomad Reels, s’alongarà pendent es dies 17 e 23 de mai, e a coma objectiu qu’es persones inscrites aprofiten es gessudes esportives ara montanha entà remassar es residus que se trapen pendent eth trajècte

Eth Conselh Generau d’Aran, amassa damb er Ajuntament de Vielha e Mijaran, e es associacions Aran pera Natura e Nomad Reels, a organizat, damb motiu deth Dia Mondiau deth Reciclatge, era campanha “Hè un pensament”.

A trauès d’aguesta campanha, que s’amiarà a tèrme des d’aué 17 de mai enquia dimenge 23, es persones que participen aprofitaran es gessudes socioesportives ara montanha entà remassar era lordèra que se trapen en trajècte.

“Er objectiu d’aguesta campanha ei, entre toti e totes, mantier es nòstes montanhes e camins nets e liures de lordèra”, explicaue eth conselhèr de Territòri, Paisatge e Gestion Ambientau, Oriol Sala, en tot híger que: “ei important suenhar eth nòste auviatge naturau, es nòsti paisatges, e pensam qu’actes coma aguest pòden ajudar a conscienciar ara societat sus era importáncia de non lançar lordèra enes espacis naturaus”.

En aguest sens, eth conselhèr Sala afirmaue que: “enguan, pr’amor dera COVID-19 non poiram organizar un acte multitudinari, mès convidam as persones interessades a participar de forma individuau o en grups de maxim 6 persones, respectant tostemp es mesures establides pes autoritats sanitàries” e a rebrembat “qu’es participaires hèsquen a servir guants entara remassada per motius de seguretat, e que reciclen es residus remassats tostemp que sigue possible”.

Es persones que volguen participar ena campanha “Hè un pensament”, se pòden inscríuer per miei der email residus@aran.org o trucant ath tlf 973 64  18 01.

Ath delà, s’a dubèrt un rèpte entà remassar 2.000 residus ena app globau de neteja Litterati. Entà participar en rèpte #HèUnPensament de Litterati, sonque ei de besonh installar aguesta app, híger eth còdi 780132 e hèr fotos des residus remassadi entà arténher eth resultat.

Eth dissabte 22 de mai entàs 19 ores, s’a organizat tanben era projeccion deth documentau Everest Green damb era intervencion deth sòn director ena Sala Era Audiovisuau de Vielha. Aguest documentau mòstre es devastadors efèctes mieiambientaus qu’a auut era activitat umana en Everest, a on s’acumulen tònes de lordèra.

As participaires inscrits se les autrejarà un petit detalh, que poiràn remassar enes parades plaçades enes pòrges des Ajuntaments de Vielha e de Les, e ena Oficina de Torisme de Salardú eth dia 23 de mai de 10:00 a 14:00 ores.

Toti es participaires que volguen compartir es sues fòtos, poiran etiquetar eth Conselh Generau d’Aran e híger eth hashtag #HèUnPensament